Masalimo 42 - IBAYIBOLO 2024

Ibuku Ilyabubili Masalimo 42-72 Ulwiputo ulwa muntu yuyo ali kuchisu icha buzya

Kumulongozi uwa bwimbi. Ukwinong'ona nkani Isalimo ilya baluko ulwa Kola.

¹ Ngati mumo imbabala yikusambila utusoko utwa mizi, wee Chala wane nane bulo nkukusamba.

² Umoyo wane ghuli ni nyota nu Chala, u Chala umumi. Po nkimba nkwiza pakubuka liyi pakumwiputa u Chala?

³ Nkulila pamusanya na pabusiku bulo, sona amasozi gho chakulya chane. Akabalilo kosi abalwani bane bakundalusya bakuti, “Nkimba u Chala wako ali ko kwiyi?”

⁴ Umoyo wane ghukumbaba nanti navikumbuka ivintu ivyakale, bo nkuvikumbuka vinivi, nkuchilongozezya ichilundilo ku Nyumba iya Chala. Nkabalongozya bo bakwenda mumusebo, sona bo bakukolomoka umwalusekelo pakwimba inyimbo izyakupalizikizya u Chala.

⁵ Wee muzimu wane, nkimba choni chicho uli ni chitima? Fwandi choni chicho mukasi mumwane mukutamiwa? Ukwiza pakumulindilila u Chala, pakuti nkwiza pakumupala, Umupoki wane nu Chala wane.

⁶ Umoyo wane ghukutamiwa, polelo nkwiza pakukukumbuka, bo indi muchisu icha Yolodani, sona bo indi pighamba ilya Helimoni nilya Mizali.

⁷ Amizi amibizu ghakwitizannya, bo amizi ghakupoma nkani. Amayigha ghako aghakoghofya ghope ghankupikila.

⁸ Loli u Mwene akungana nu lughano lwache isiku ni siku, cho chifukwa pabusiku nkwimba ulwimbo nukumwiputa u Chala yuyo ampiye ubumi.

⁹ Nkumulalusya u Chala, Ilyalabwe lyane nkuti, “Nkimba choni chicho wanduvya? Nkimba choni chicho indilaye, pachifukwa ichakuti abalwani bane bakunjivya?”

¹⁰ Intuko izya balwani bane zikunjivya ngati yo nkonko, bo abakumbenga bakunyobezya pakundalusya isiku lyosi ukuti, “Nkimba u Chala wako ali ko kwiyi?”

¹¹ Wee muzimu wane, nkimba choni chicho uli ni chitima? Nkimba choni chicho mukasi mumwane mukutamiwa? Umulindililaye u Chala, pakuti nkwiza pakumupala, yuyo Mupoki wane sona nu Chala wane.