Masalimo 41 - IBAYIBOLO 2024

Ulwiputo lwamuntu umubine

Kumulongozi uwa bwimbi. Isalimo ilya Devedi.

¹ Musayiwa umuntu yuyo akubapasikizya abapina, po u Mwene akumupokagha pakabalilo akantamyo.

² U Mwene akwiza pakumuvighilila nukubusungilila akiza ubumi bwache. Akwiza pakumusaya muchisu, sona atakwiza pakumubika munyobe izya balwani bache.

³ U Mwene akwiza pakumufukatila nanti akubina, sona akwiza pakumupozya kububine bwache.

⁴ Po nkati, “Wee Mwene umpelelaye ichisa, umpozye pakuti nkunangiye.”

⁵ Abalwani bane batakundondela ubwiza, po bakuti, “Nkimba akwiza pakufwa liyi umwakuti itabwa lyache lizimilaye?”

⁶ Nanti umuntu yumo akwiza pakunyennya, atakwiza nu moyo uwanaloli, po nanti epapo akwanda pakufumusya ipangwi ibibi.

⁷ Abalwani bane bosi bakuteketa nizya ane, bakunyinong'onela ivibibi nukuti,

⁸ “Ali nu bubine ubwakufwa nabo, atakwiza pakunyamukapo papo alambalaye.”

⁹ Wepe nu mumanyani wane bulo uwa pamoyo, yuyo nkulya poka nawe ichibama, ansambukiye.

¹⁰ Loli awe Mwene, umpelelaye ichisa, unyamusye umwakuti imbatanizye.

¹¹ Inzimenye ukuti uhobokite nane, pakuti umulwani wane atakumpota.

¹² Wanvighililagha pachifukwa icha busubiliwa bwane, sona wambikagha pamaso papako bwila na bwila.

¹³ U Mwene u Chala uwa ba Izilayeli, apaliwanje pakabalilo aka bwila na bwila. Ameni! Ameni!