Masalimo 40 - IBAYIBOLO 2024

Ulwiputo lwakulaba ubwavwilizi

Kumulongozi uwa bwimbi. Isalimo ilya Devedi.

¹ Nkamulindilila u Mwene nu lusubilo, po akanteghelezya nukwivwa ulwiputo lwane ukuti anyavwe.

² Akanyefyamo muchiliba ichakoghofya, nukunzubula mumatope na muvinyazu. Po akazikanyizya inyayo zyane pilyalabwe, sona akazikazya inyayo zyane.

³ Mumulomo wane akabikamo ulwimbo ulupya, ulwimbo ulwakumupala u Chala witu. Abinji bakwiza pakuzyennya zinizi nukunyila, po bakwiza pakumusubila u Mwene.

⁴ Musayiwa umuntu yuyo amusubiye u Mwene wache, yuyo atakubadepukila abantu abakwituvya, kubabo bakupulumpila ku bachala abamyasi.

⁵ Wee Mwene Chala wane, watubombela ivintu ivyinji nkani, Atalipo nayumoyumo umuntu uwakuyana nawe! Watubatikila ivintu ivyinji nkani ivyakuswighisya. Nanti nkavinenagha nukuvivumbula, ngali vyaba vyinji nkani pakuvitambula.

⁶ Utakuhoboka ni vyakwiyipa sona ni vyabupi, loli wanyighula amakutu ghane, sona ivyakwiyipa ivyakocha ni vyakwiyipa ivyakupepesezya imbibi utakuvilonda.

⁷ Po nkati, “Indi pano, niza zisimbiwe mwibuku ilya ndaghilo.

⁸ Wee Chala wane nkuhoboka nkani, pakubomba ubwighane bwako, sona ululaghilo lwako luli mumoyo wane.”

⁹ Wee Mwene, nkulumbilila nizya bugholosu bwako palukomano ulukulu nkani. Wee Mwene sona intasonitepo nalumo umulomo wane ngati mumo uzimanyiye.

¹⁰ Ntaghuvinditepo umoyo wane ukuti we mugholosu, loli nabafumuzizya abinji nizya busubiliwa nu bupoki bwako. Intakaluvindapo pakunena nizya lughano lwako nu bwanaloli, pakasi palukomano ulukulu nkani.

¹¹ Wee Mwene utakanyimaye ichisa chako, sona ulughano nu busubiliwa bwako vinvighililaye akabalilo kosi.

Ulwiputo ulwa bwavwilizi

¹² Pakuti intamyo zizyo zitangabelengiwa zizyunguliye, imbibi zyane zyamila, po intangennya sona. Imbibi zyane nyinji nkani ngati sisi izya kumutu wane, sona amaka ghamalila.

¹³ Wee Mwene, uhobokaye nane ukuti umpoke. Wee Mwene, nyavwe lunulu.

¹⁴ Bosi babo bakulonda pakubwefya ubumi bwane, bakoziwanje isoni nukuvulungana. Bosi babo bakulonda pakubupelela intamyo ubumi bwane, banyokelaye kwisinda nukukoziwa isoni.

¹⁵ Baswighaye nukukoziwa isoni bosi babo bakunyobezya bakuti, “Eya, eya!”

¹⁶ Loli basekelaye nukuhoboka bosi babo bakukulonda, sona bosi babo babughanite ubupoki bwako akabalilo kosi batinji, “U Mwene akweziwanje!”

¹⁷ Loli ane ne mupina sona mupotwe, po u Mwene anyinong'onelaye. Wee Chala wane, we mwavwilizi wane sona we mutabuli wane, utakazyelaye.