Masalimo 39 - IBAYIBOLO 2024

Ukwilata imbibi

Kumulongozi uwa bwimbi. Ukumwimbila u Yedutuni. Isalimo ilya Devedi.

¹ Nkati, “Nkwiza pakucheba nkani ni mbombo zyane, sona nkwiza pakululema ululimi lwane ukuti lutakanangaye. Nkwiza nukughusona bulo umulomo wane, bo indi pakasi pabantu ababibi.”

² Loli bo indi bulo myee sona intakanenapo nachimochimo ichiza, pope bulo intamyo zyane zikonjelela.

³ Umoyo wane ghukatamiwa nkani, sona bo nkwinong'ona, umoto ghukakagha, po nkati:

⁴ “Wee Mwene, mbuzya ubumalilo ubwa bumi bwane, sona umbuzye ukuti amasiku ghane ghasyala malinga. Umbuzye isiku lilyo nkwiza pakufwila.

⁵ Waghapela amasiku agha bumi bwane pakuba mapimpa ngati chikufi, akabalilo aka bumi bwane kate ni mbombo pamaso papako. Naloli umuntu wesi ali ngati muyi bulo.

⁶ Umuntu akwendakwenda bulo ngati muzyezye, sona akwitamya bulo ni vintu vivyo vite ni mbombo. Akwilundikila ubukabi, loli atamumenye yuyo akwiza pakwilagha ubumi bwache bulabula.

⁷ “Wee Mwene, po nkimba nkulindilila ichoni? Ane nkukulindilila wewe.

⁸ Umpokaye kububibi bwane bosi, utakabitikizyanje abapunganu ukuti banyobezyanje.

⁹ Nkaba bulo myee, intakalondagha na pakunenapo chimo, pakuti wewe wazibomba zinizi.

¹⁰ Efyapo indisa yako papane, ane navulala nkani pachifukwa icha kunsyempa.

¹¹ Ukubachemela abantu pachifukwa icha mbibi zyabo nukubapa amafundwe, ukubunangannya ubukabi bwabo ngati mumo impezu zikubombela, pakuti umuntu ali ngati muyi bulo.

¹² “Wee Mwene, ivwa inyiputo zyane. Teghelezya ukulila kwane ukuti unyavwe, sona utakabanje ngati we mapuli bo nkulila. Pakuti nkwikala nawe ngati ne mwendazila, sona ngati ne muyeni ukuyana namumo abanyenya bitu bakabela.

¹³ Undeke ne mwene umwakuti inhobokaye sona, bo inchili na pakufwa nukuzimila pamaso papako.”