Masalimo 38 - IBAYIBOLO 2024

Ulwiputo ulwa muntu yuyo ali mumayimba

Isalimo ilya Devedi Ichikumbusyo.

¹ Wee Mwene utakanchemelaye nubukali bwako, pamo utakakalalaye nukunfunda.

² Pakuti utulasilo twako twandasa, sona wanfunda na maka ghako amakulu nkani.

³ Pachifukwa icha bukali bwako nkubabwa nkani. Umubili wane ghosi wabina, pachifukwa icha mbibi zyane.

⁴ Imbibi zyane zyanyibizya, ngati we katundu umung'wamu nkani.

⁵ Ivilonda vyane vibolite sona vikununka, pachifukwa icha bupunganu bwane.

⁶ Infughamiziwe nukusamuliwa nkani, isiku lyosi nkulila.

⁷ Umusana ghukumbaba nkani, sona ghope umubili wane ghute na maka.

⁸ Naghanda nukudedebala, nkukoloma pachifukwa icha bubavu ubwa mumoyo wane.

⁹ Wee Mwene vyosi vivyo nkusobelwa uvimenye, ukukoloma kwane kutavwamite, awe.

¹⁰ Umoyo wane ghukukoma, amaka ghamalila, sona kope ukulama mu maso ghane kwamala.

¹¹ Abamanyani na bapalamani bane bakumpambata, pachifukwa icha vilonda vyane. Abapalamani bane bakuntantama.

¹² Abantu babo bakubulondelezya ubumi bwane bakuntegha, abantu babo bakulonda pakumvulazya bakunena nizya ukunangannya, akabalilo kosi bakubatika nizya kumbombela ububibi.

¹³ Indi ngati wamapuli, yuyo atakwivwa, sona indi ngati we chinunu, yuyo atakunena.

¹⁴ Naba ngati muntu yuyo atakwivwa, umuntu yuyo atangamula nachimochimo.

¹⁵ Wee Mwene wane nkukulindilila wewe, po ukwiza pakunyamula wee Mwene u Chala wane.

¹⁶ Nkwiputa ukuti, “Mutakabitikizye ukuti basekelelaye papane. Abantu babo bakwikwezya bo ulwayo lwane lukutyelemuka.”

¹⁷ Pakuti indi papipi pakuwa, inchili nkwivwa ububavu.

¹⁸ Nkwilata ukunanga kwane, sona imbibi zyane zikuntamya nkani.

¹⁹ Abalwani bane binji sona bamaka, bope abakumbenga bo intanangite nachimochimo baba binji.

²⁰ Abakuntanizya ububibi pabwiza, bakunsusya bo nkubomba inyiza.

²¹ Wee Mwene utakandekaye nemwene, wee Chala wane utakabanje kubutali nane.

²² Wee Mwene Umupoki wane, zagha lubilolubilo pakunyavwa.