Masalimo 37 - IBAYIBOLO 2024

Nizya ntazi iya bantu ababibi na bantu abiza

Isalimo ilya Devedi.

¹ Utakapasyanje pachifukwa icha bantu ababibi, pamo utakabanje na kabini na bantu babo bakubomba ububibi.

² Pakuti ngati lisote, bakwiza pakufoka lunulu bulo, ngati vimelwa iviteta, bakwiza pakufwa lunulu.

³ Umusubilaye u Mwene, nukubomba inyiza, ikala muchisu nukwilagha ubumi ubwiza.

⁴ Uhobokaye mwa Mwene, po akwiza pakukupa vivyo umoyo wako ghukuvilonda.

⁵ Ibika wemwene munyobe izya Mwene, umusubile yuyo, po akwiza pakukwavwa.

⁶ Akwiza pakubupela ubugholosu bwako pakulama ngati ko kubuche, sona ubwanaloli bwako bukwiza ngati gho musanya.

⁷ Banga bulo myee pamaso pa Mwene, sona umulindililaye yuyo nu bufisalyoyo. Utakapasyanje nanti abanji ivintu vikubendela akiza, sona nanti bakubomba imbombo zyabo imbibi.

⁸ Ubuleghukaye ubukali pamo ubukalale, sona utakabombaye vinivi, pakuti vikumulongozezya bulo umuntu pakubomba ububibi.

⁹ Pakuti abantu ababibi bakwiza pakunyunkuliwa, loli babo bamusubiye u Mwene bakwiza pakuchipyana ichisu.

¹⁰ Pasyala panandi bulo, po abantu ababibi bakwiza pakuzimila, napapo ungabalondelezya loli batakwiza pakwaghiwapo.

¹¹ Loli abantu abakwiyisya bakwiza pakupyana ichisu sona bakwiza pakwilagha umutende ghugho ghutakubelengiwa.

¹² Ababibi bakubatika pakubabombela abagholosu ivintu ivibibi, sona bakubamemenela amino.

¹³ Loli u Mwene akubaseka abantu ababibi, pakuti azimenye ukuti isiku ilyakunanganika kwabo likwiza.

¹⁴ Abantu ababibi bakuwesa abapanga nubwele bwabo ukuti babaghoghaye abapina na bapotwe, sona na bosi babo bagholosu.

¹⁵ Loli abapanga babo bakwiza pakughalasa amoyo aghabo na ghabo, sona ubwele bwabo bukwiza pakupyoka.

¹⁶ Utunandi tuto umugholosu ali nato, tukubuchila ubukabi bubo umuntu umubibi ali nabo.

¹⁷ Pakuti amaka agha bantu ababibi ghakwiza pakumala, loli u Mwene akubimila abantu abagholosu.

¹⁸ U Mwene aghamenye amasiku agha bantu babo bate ni chilema nachimochimo, sona impyana yabo yikwiza pakubangako bwila na bwila.

¹⁹ Pakabalilo akantamyo batakwiza pakuyimba, sona pakabalilo aka zala bakwiza pakuba ni chakulya ichakukwana.

²⁰ Loli abantu ababibi bakwiza pakuzimila. Abalwani aba Mwene bakwiza pakuba ngati bwezya ubwa muzi, naloli bakuzyebeluka ngati lyosi.

²¹ Umuntu umubibi akwazima, sona atakunyosezya papo. Loli umuntu umugholosu akupa ukuyana ni chisa chache.

²² Abantu babo u Mwene akubasaya bakwiza pakupyana ichisu. Loli babo akubaghuna bakwiza pakuzimila.

²³ Nanti u Mwene ahoboka ni nkalo iya muntu, akumulongozya mukendele kache.

²⁴ Napapo angipunula, atakwiza pakuwa pakuti u Mwene akumulema ni nyobe yache.

²⁵ Ukwandila papo nkaba ne mwana munandi mupaka papo nkaba ne songo, loli intamwenizyepo u Chala ukuti amulekite mwene umuntu umugholosu, pamo abana bache pakulaba ichakulya.

²⁶ Akabalilo kosi bakuba bachisa, sona bakubazimya abantu abanji. Po abana babo bakwiza pakuba lusayo.

²⁷ Ubuleghukaye ububibi, sona ubombaye inyiza, po ukwiza pakwikalagha muchisu bwila na bwila.

²⁸ Pakuti u Mwene abughanite ubwanaloli, sona atakwiza pakubaleka bene abasubiliwa bache. Bakwiza pakuvighililiwa bwila na bwila, loli abana aba bantu ababibi bakwiza pakuzimila.

²⁹ Abagholosu bakwiza pakupyana ichisu, sona bakwiza pakwikalagha mulamula bwila na bwila.

³⁰ Umulomo uwa muntu umugholosu ghukunenagha amahala ghene, sona lope ululimi lwache lukunenagha ubwanaloli bwene.

³¹ Indaghilo izya Chala zili mumoyo wache, sona zyope inyayo zyache zitakutyelemuka.

³² Abantu ababibi bakubavwamilila abagholosu, pakubulondelezya ubumi bwabo.

³³ Loli u Mwene atakwiza pakubaleka munyobe izya balwani babo, pamo ukuti batakabanje ninongwa pantazi pabalongi.

³⁴ Umusubilaye u Mwene, nukuzikonka izila zyache, po akwiza pakukukwezya umwakuti ukwiza pakuchipyana ichisu. Bo abantu ababibi bazimila, ukwiza pakubennya.

³⁵ Nkamwennya umuntu umubibi akwituvya sona akukweziwa, ngati likwi ilya lizwangwa.

³⁶ Loli pisinda pache bo nadumusannya sona, nkamwennya ukuti atakabapo palapala. Napapo nkamulondelezya, loli atakighiwa.

³⁷ Umwenelezye nkani umuntu yuyo ate ni chilema nachimochimo, sona umupime umuntu umugholosu, umuntu uwa umutende akuba nabanyenya abinji.

³⁸ Loli ababomba imbibi bosi bakwiza pakunanganika, sona abanyenya babo bakwiza pakuzimila.

³⁹ Ubupoki ubwa bantu abagholosu bukufuma kwa Mwene, sona we lilinga lyabo pakabalilo akantamyo.

⁴⁰ U Mwene akubavwa nukubapoka. Akubapoka munyobe izya bantu ababibi, pachifukwa ichakuti bakuchimbilila kukwache.