Masalimo 36 - IBAYIBOLO 2024

Ububibi ubwa muntu

Kumulongozi uwa bwimbi. Isalimo ilya Devedi umubombi uwa Mwene .

¹ Imbibi yikunena mumoyo uwa muntu umubibi, Kutaliko ukumwiputa u Chala pamaso papache.

² Pakuti akwizimbula mwene mumoyo wache umwakuti atangazyaghannya imbibi zyache nukuzibenga.

³ Amazyu agha mumulomo wache mabibi sona mazimbuli, alekite pakuba muntu uwamahala, umwakuti atakubomba nabumobumo ubwiza.

⁴ Bo alambalaye pachitala chache akwinong'ona ububibi bwene, akwibika mwene mu mbibi, sona atakubuleghuka ububibi.

⁵ Wee Mwene ulughano lwako lwafika mupaka kumwanya, sona ubusubiliwa bwako bope bwafika mumabingu.

⁶ Ubugholosu bwako buli ngati maghamba aghamaka, sona ubwanaloli bwako bope buli ngati nyanja inyibizu. Wee Mwene, ukubasungililagha abantu ni vinyamana.

⁷ Ulughano lwako lwapamwanya nkani, sona abantu bako bakuvwamila kusi ku vipapande vyako.

⁸ Bakwikuta ni vinoni ivya munyumba yako, sona ukubangw'esya amizi agha mulusoko ulwalusayo lwako.

⁹ Pakuti imbwibwi iya bumi yili nawe, sona tukwennya ulukozyo ukufuma mulukozyo lwako.

¹⁰ Ubaghanaye abantu babo bakumenye, sona ubalanjizyanje ubulugholosu abantu babo bali na moyo aghanaloli.

¹¹ Utakitikizyanje inyayo izya bantu abakwituvya ukuti zinkanyaye, pamo ukuti inyobe iya bantu ababibi yinchimbizyanje.

¹² Ennya mumo abantu ababibi bawiliye pasi, sona balambalaye bulo, umwakuti batanganyamuka.