Masalimo 35 - IBAYIBOLO 2024

Ukulaba ubwavwilizi

Isalimo ilya Devedi.

¹ Wee Mwene, ubasusyanje abantu babo bakususannya nane, sona lwana na bantu babo bakulwa nane.

² Senda ingulu ni vilwilo vyako ivya bwite, sona vundumuka wizaghe pakunyavwa.

³ Nyamula impalala ni ntughu, ukuti ulwane na babo bakunchimbizya. Po ughubuzye umoyo wane utinji, “Ane ne mupoki wako.”

⁴ Bakoziwanje isoni babo bakubulondelezya ubumi bwane sona basamuliwanje. Bakoziwanje isoni babo bakubatika pakumbombela ivibibi sona banyokelaye kwisinda

⁵ Babanje ngati lyelelo lilyo likupupuka ni mpepo, bo uwantumi uwa Mwene akubachimbizya.

⁶ Izila zyabo zibanje ni chisi sona batyelemukaye bulo, bo uwantumi uwa Mwene akubachimbizya.

⁷ Pakuti bakantegha ichipingo bo pate ichifukwa nachimochimo, nukukumba ichiliba ukuti ingwilayemo.

⁸ Ukunanganika kubawilaye umwakuchenusya bulo. Po ichipingo chicho bateghite chibalemaye bene, sona nukuwila mukunanganika kwabo.

⁹ Po umoyo wane ghukwiza pakuhoboka mwa Mwene sona ghukwiza pakusekela pachifukwa icha bupoki bwache.

¹⁰ Nu moyo wane ghosi nkwiza pakunena ukuti, “Wee Mwene, nkimba wewenu ayanite nawe? Ukubapoka abapina munyobe izya bantu abamaka ukubachila, sona ukubapoka abapina na bapotwe munyobe izya bantu babo bakubafyula ivintu vyabo.”

¹¹ Abakaboni abamyasi bakunsambukila, sona bakundalusya ivintu vivyo intavimenye.

¹² Bakuntanizya ivintu ivibibi pa vintu ivyiza. Sona mumoyo wane muli cho chitima chene.

¹³ Loli bo babinite, nkavwalagha amasaka, sona nkatuzya pakulya. Bo inyiputo zyane zitamuliwe.

¹⁴ Nkaba ngati po nkulilila umumanyani pamo uwamwitu, nkendendekagha ngati po muntu yuyo akulila unyina.

¹⁵ Loli nanti nipunula bakuhoboka, bakubungana poka ukuti banyobezye, abantu abalemazu babo intabamenye nalumo, bankomagha ukusita ukuleka.

¹⁶ Bakanseka nu musamu umukulu nkani, bakamemenela amino ghabo.

¹⁷ Wee Mwene, nkimba ukwiza pakuchennya bulo mupaka liyi? Bupokaye ubumi bwane kubukali bwabo sona ubupokaye ubumi bwane ku nkalamu zinizi.

¹⁸ Nkwiza pakukupalizya pa lukomano ulukulu nkani, sona nkwiza pakukupalagha pamaso pabantu bosi.

¹⁹ Batakasekelelaye papane pamo abantu babo bambengite, batakanyennyanje ni lyiso ichesamu.

²⁰ Batakunenapo nizya mutende, loli bakwighana pakubanena ububibi, babo bakwikala mumutende pachisu ichapasi.

²¹ Bakunyasamila amalomo ghabo bakuti, “Eee! Eee! Tukazyennya na maso ghitu zizyo ukabomba.”

²² Wee Mwene, wazyennya zinizi utakabanje bulo myee. Wee Mwene, utakabanje kubutali nane.

²³ Mwene wane, vundumuka ukuti unvighilile, Chala wane, nyamuka nukundwila ubwite.

²⁴ Wee Mwene, Chala wane umpimaye pakuba ne muntu yuyo atanangite, pachifukwa icha bugholosu bwako, utakabitikizyanje abalwani bane ukuti bansekaye.

²⁵ Batakinong'onaye ukuti, “Eee twavyagha vivyo twavilondagha” Pamo ukunena ukuti, “Twamumila bulo.”

²⁶ Bakoziwanje isoni nkani nukuvulungana abantu bosi, babo bakuhoboka pachifukwa ichakuyimba kwane. Bakoziwanje isoni nukusamuliwa, babo bakwikwezya pamaso papane.

²⁷ Balulutilaye nukusekela abantu babo bakulonda ukubwennya ubugholosu bwane, akabalilo kosi batinji, “U Mwene akweziwanje, akuhoboka nkani nu bwiza ubwa mubombi wache.”

²⁸ Po nkwiza pakulumbilila ubugholosu bwako nukukupala amasiku ghosi.