Masalimo 34 - IBAYIBOLO 2024

Ukumupalizya u Mwene pachifukwa icha bwiza bwache

Isalimo ilya Devedi yuyo akaba ngati po we chipena pamaso pa Abimeleki, po akumuchimbizya.

¹ Nkwiza pakumupalagha u Mwene akabalilo kosi, sona amapalo ghache ghakwiza pakuba mumulomo wane akabalilo na kabalilo.

² Umuzimu wane ghukwituvikizya mwa Mwene, abantu babo bakuyimba bivwanje nukuhoboka.

³ Lumbililagha poka nane nizya bukulu ubwa Mwene, zagha tulikwezyanje poka itabwa lyache.

⁴ Nkiputa kwa Mwene, po akanyamula, akampoka ku vyosi vivyo nkavinyilagha.

⁵ Babo bakwennya kukwache, bakwiza pakulama, sona batakukoziwanga isoni nalumolumo.

⁶ Umuntu umupina uyu akalila, po u Mwene akamwivwa, sona akamupoka muntamyo zyache zyosi.

⁷ Uwantumi uwa Mwene akubavighililagha babo bakumuchindika, sona akubapoka bosi.

⁸ Mumuyezyanje, po mukwiza pakumanya ukuti u Mwene mwiza. Musayiwa umuntu yuyo akuchimbilila kukwache.

⁹ Mwee bantu bache abazelu, mumuchindikaye u Mwene, pakuti bosi babo bakumuchindika batakusobelwapo nachimochimo.

¹⁰ Na bana aba nkalamu bope bakusobelwa ichakulya, loli babo bakumulondelezya u Mwene batakusobelwapo ivintu ivyiza.

¹¹ Mwee bana bane, zagha munteghelezyanje, po nkwiza pakubamanyisya pakumunyila u Mwene.

¹² Nkimba ukulonda pakwilagha ubumi, sona ukulonda pakuba nubumi ubutali nu buhobosu?

¹³ Po utakanenaye ivintu ivibibi, sona umulomo wako ghutakatamantaye.

¹⁴ Uzileghukaye imbibi, nukubomba zizyo nyiza, ubanje nu lweke pakughulonda umutende nukughukonka.

¹⁵ Amaso agha Mwene ghakubennyanga abantu abagholosu, sona amakutu ghache ghakuteghelezya ukulila kwabo.

¹⁶ Loli u Mwene akubakalalila babo bakubomba ububibi, po batakwiza pakukumbukiwangapo nalumo pachisu ichapasi.

¹⁷ Nanti abagholosu balila, u Mwene akubivwanga, po akubapoka muntamyo zyabo zyosi.

¹⁸ U Mwene ali papipi na babo bavulaye mumoyo, sona akubapoka babo banyokeye kwisinda.

¹⁹ Umugholosu angaba nintamyo inyinji nkani, loli u Mwene akumupoka muntamyo zyosi zinizi.

²⁰ Akughasungililagha akiza amafupa ghache ghosi, po litalipo nalimolimo lilyo likwiza pakupyoka.

²¹ Ububibi bukumunyokela umuntu umubibi, abantu babo bamubengite umuntu umugholosu bakwiza pakufundiwa.

²² U Mwene akubapoka ababombi bache, sona atalipo nayumoyumo umuntu yuyo akuchimbilila kukwache akwiza pakufundiwa.