Masalimo 33 - IBAYIBOLO 2024

Ulwimbo ulwamapalo

¹ Mwee bantu abagholosu, mumwimbilaye u Mwene nu buhobosu, pakuti abagholosu babaghiye bamupalizyanje.

² Mumupalaye u Mwene ni chinanda, mumwimbilaye na mapango agha mpote izya chela 10.

³ Mumwimbilaye ulwimbo ulupya, mumulizizyanje nu bwafundi amapango, sona mukulomokaye pachifukwa icha buhobosu.

⁴ Pakuti amazyu agha Mwene magholosu sona ghanaloli, sona we musubiliwa muvyosi vivyo akubomba.

⁵ U Mwene abughanite ubugholosu nu bwanaloli, sona ichisu ichapasi chizuye nu lughano lulo lutakupotwanga nalumolumo.

⁶ U Mwene akanena bulo amazyu, po ivyakumwanya vikapeliwa. Intondwa, umwezi ni zuba bo afuta bulo umuyi.

⁷ Akaghabungannya amizi agha munyanja nukughabika impaka, sona amizi amibizu akighalila munyumba izyakusungilamo ivintu.

⁸ Ichisu chosi ichapasi chimwiputaye u Mwene, sona abantu bosi aba pachisu ichapasi bamuchindikaye yuyo.

⁹ Pakuti bo anena bulo, ichisu ichapasi chikapeliwa, sona bo alamula bulo, ichisu ichapasi chikikalana.

¹⁰ U Mwene akuzivulungannyanga imbatiko izya inko imbibi, sona akuzipelagha pakuba zyabulo inyinong'ono izya luko.

¹¹ Loli imbatiko izya Mwene zikuba bulabula bwila na bwila, sona inyinong'ono zyache zikubangako mupaka inkulilo zyosi.

¹² Lusayiwa uluko ulwa bantu pakuti u Mwene we Chala wabo, kokuti abantu babo akabasala pakuba mpyana yache.

¹³ U Mwene akwennya pasi, bo ali kumwanya, po akubennya abantu bosi.

¹⁴ Bo ikaye pachitengo chache icha bumwene, akubenelezya bosi babo bakwikalagha pachisu ichapasi.

¹⁵ Yunuyu weyuyo akaghamata amoyo agha bantu bosi, sona yuyo akwennya vyosi vivyo bakubombagha.

¹⁶ Atalipo nayumoyumo u mwene yuyo akupota pachifukwa icha basilikali bache abamaka, pamo umusilikali ukupona pachifukwa icha maka ghache amakulu.

¹⁷ Ukuyisubila ifalasi pabwite kutangamwavwa umuntu napapo yingaba na maka amakulu nkani yitangamupoka.

¹⁸ Loli amaso agha Mwene ghali pabantu babo bakumuchindika, kokuti abantu babo bamusubiye, pachifukwa icha lughano lwache, lulo lutakupotwangapo nalumolumo.

¹⁹ Akubabombela vinivi ukuti abapokaye kubufwe sona nukuti babanje nubumi pakabalilo aka zala.

²⁰ Zagha tubikaye ulusubilo lwitu mwa Mwene, pakuti we mwavwilizi witu, sona we ngulu yitu.

²¹ Amoyo ghitu ghakuhoboka pachifukwa icha yuyo, pakuti tulisubiye itabwa lyache izelu.

²² Wee Mwene ulughano lwako lulo lutakupotwangapo nalumolumo lubanje naswe, pakuti tukusubiye wewe.