Masalimo 32 - IBAYIBOLO 2024

Ukwilata imbibi nukuhobokeliwa

Ukwinong'ona nkani. Isalimo ilya Devedi.

¹ Musayiwa umuntu yuyo ukunanga kwache kwahobokeliwa, yuyo imbibi zyache zyazimiwa.

² Musayiwa umuntu yuyo u Mwene atakuzibelengela imbibi zyache, yuyo mumoyo wache ubuzimbuli butalimo.

³ Bo intilatite imbibi zyane, umubili wane ghukaghandagha, pachifukwa ichakuti nkakolomagha isiku lyosi.

⁴ Pakuti ukanfundagha nkani pamusanya na pabusiku bulo, umwakuti amaka ghane ghakafokagha ngati mumo ghakufokela amani muchisanya.

⁵ Po nkwilata imbibi zyane kukwako, ntafisitepo ukunanga kwane pamaso papako. Nkati, “Nkwiza pakwilata ukunanga kwane kwa Mwene” po ukanhobokela imbibi zyane.

⁶ Cho chifukwa umuntu wesi yuyo musubiliwa iputaye kukwako nanti akabalilo akantamyo kafikila, amizi aghakwizula ghatakwiza pakubabukizya,

⁷ Awe we buzilo bwane ubwakuvwamamo. Ukwiza pakumpoka muntamyo, sona nukunzyungulila ninyimbo izyakubupala ubupoki bwako.

⁸ Nkwiza pakukulanjizya nukukumanyisya izila izyakuti wendayemo, sona nkwiza pakukulongozya nukukwenelezya.

⁹ Utakabanje ngati falasi pamo impunda impunganu, yiyo yikulongoziwanga ni chela sona ninkusa kumulomo wache ukuti yikwivwilaye.

¹⁰ Intamyo inkulu nkani zikubawilagha abantu ababibi, loli ulughano ulwa Mwene lulo lutakupotwangapo nalumolumo lukumusungilila akiza umuntu yuyo asubiye mumwache.

¹¹ Mwee bantu abagholosu, muhobokaye mwa Mwene, sona mwimbaye mwebosi mwe muli na moyo amagholosu.