Masalimo 31 - IBAYIBOLO 2024

Ulwiputo ulwakumusubila u Chala

Kumulongozi uwa bwimbi. Isalimo ilya Devedi.

¹ Wee Mwene, awe we buzilo bwane ubwakuchimbililako. Utakitikizyanje nalumo ukuti nkoziwe isoni, unyavwe nukunvighilila pakuti we mugholosu.

² Unteghelezye sona umpokaye lubilolubilo. Ubanje we lyalabwe lyane ilyakuvwamako sona ubanje we lilinga lyane ilyakuponelamo.

³ Pakuti we lyalabwe lyane ni linga lyane, sona pachifukwa icha litabwa lyako, undongozye nukundongolela.

⁴ Umpoke kuvipingo vivyo banteghite navyo, pakuti wewe we lilinga lyane.

⁵ Wee Mwene Chala wanaloli, nkughubika umuzimu wane munyobe zyako, umpoke.

⁶ Imbabengite babo bakuvyiputa ivifwani, loli nkusubiye awe we Mwene.

⁷ Nkwiza pakuhoboka nukusekela pachifukwa icha lughano lwako lulo lutakupotwa nalumolumo. Pakuti ukaghennya amayimba ghane sona ukakumanya ukutamiwa ukwa moyo wane.

⁸ Po utakambika munyobe izya balwani bane, loli ukanyimika pabuzilo ubukulu nkani.

⁹ Wee Mwene umpelelaye ichisa, pakuti nkukomana na mayimba. Amaso ghane ghope ghakufoka pachifukwa icha chitima, umuzimu wane nu mubili wane vite na maka sona.

¹⁰ Ubumi bwane bukumala pachifukwa icha chitima, amaka ghane ghakumala pachifukwa icha kulila. Amaka ghane ghakupotwa pachifukwa icha kuyimba kwane amafupa ghane ghavyughuka.

¹¹ Pachifukwa icha balwani bane bosi, ane naba ne chakusesya pakasi pa bapalamani bane. Ane naba ne chakoghofya pamaso pa bamanyani bane, sona nanti abantu banyagha mumisebo, bakunchimbila.

¹² Abantu banduvizye ngati po infuye, naba ngati sonta infwantannye.

¹³ Pakuti nkwivwa ukuteketa ukwa bantu abinji sona bakunyoghofya kumbazu zyosi. Bakunenezannya nizya kunsambukila, sona bakubatika ukuti bangoghe.

¹⁴ Wee Mwene wane, nkusubiye wewe. Po nkuti, “Awe we Chala wane.”

¹⁵ Utubalilo utwa bumi bwane tuli munyobe zyako, umpokaye munyobe izya balwane bane sona na munyobe izya bantu babo bakumbingambinga.

¹⁶ Icheni chako chindamilaye ne mubombi wako, sona umpokaye ni chisa chako chicho chitakupotwangapo nalumolumo.

¹⁷ Wee Mwene, utakitikizyanje ukuti nkoziwe isoni, pachifukwa ichakuti nakulaba. Loli abantu ababibi bakoziwanje isoni sona babanje bulo myee bo bali mwipumpa.

¹⁸ Abantu abamyasi babanje bulo myee, pakuti bakituvyanga nukubasamula abantu abagholosu.

¹⁹ Ubwiza bwako bukulu nkani, bubo ubasungiye babo bakukwivwila. Ukubalanjizya ubwiza bunubu abantu babo bakuchimbilila kukwako, sona umuntu wesi azyennya zinizi.

²⁰ Ukubafisa mukazundila aka bubapo bwako, ukubavighilila ku bantu ababibi. Ukubasungilila akiza munyumba yako, ukubapoka munyobe izya bantu abamyasi.

²¹ U Mwene apaliwanje, pakuti akandanjizya ulughano lulo lutakupotwa nalumolumo bo indi mukaya akakulu nkani kako kakazyunguliliwa na basilikali.

²² Bo nachenuka nkati, “Mwee nachimbiziwa pamaso papako!” Loli ukivwa ukulila kwane ukuti umpelelaye ichisa, bo nakwitizya ukuti unyavwe.

²³ Mumughanaye u Mwene mwebosi mwe bantu bache abazelu. U Mwene akubasungilila akiza abantu abasubiliwa loli abantu abakwituvya akubapa umuvwalo ukuyana ni mbombo zyabo.

²⁴ Mwebosi mwe mumusubiye u Mwene, mubanje na maka, sona mujimbaye nkani.