Masalimo 30 - IBAYIBOLO 2024

Ulwiputo ulwakupalizikizya

Ulwimbo ulwakuyipaghulila Inyumba iya Chala. Isalimo ilya Devedi.

¹ Wee Mwene, nkwiza pakukukwezya pakuti ukampoka, sona utakabitikizya abalwani bane ukuti banyobezyanje.

² Wee Mwene Chala wane, nkakwitizya ukuti unyavwe, po ukampozya.

³ Wee Mwene, ukanyefyamo muchisu icha bantu abafwe; sona utakitikizya ukuti imbukaye kwipumpa.

⁴ Mwee bantu bache abasubiliwa, mumwimbilaye u Mwene, sona mulipalaye itabwa lyache izelu.

⁵ Pakuti ubukali bwache bukubangako pakabalilo akapimpa bulo, loli ichisa chache cha bwila na bwila. Umuntu angachelezya pakulila, loli ubuhobosu bukwizagha po pandabindabi.

⁶ Loli bo infwasite bulo nkati, “Ntangayingana nalumolumo!”

⁷ Wee Mwene, pakabalilo kako ukampelela ichisa, ukanyikazya nkani pakuba ngati ne lighamba. Loli bo wanfisila icheni chako, nkaba nubogha nkani.

⁸ Wee Mwene nkakwitizya, sona nkamulilila u Mwene ukuti ampelele ichisa.

⁹ “Nanti nafwa, nukwinjila mwipumpa nkimba ningakabapo ichoni? Nkimba ulufumbi lungakupala? Nkimba lungafumusya nizya busubiliwa bwako?

¹⁰ Wee Mwene ivwa, umpelelaye ichisa, wee Mwene, ubanje we mwavwilizi wane.”

¹¹ Ukandula ichililo chane pakuba kujina. Ukanvula amenda agha pachitima, po ukanvwika amenda agha palusekelo.

¹² Umoyo wane ghukwiza pakukwimbila, sona ghutakwiza pakuba bulo myee. Wee Mwene Chala wane, nkwiza pakukupalizya bwila na bwila.