Masalimo 3 - IBAYIBOLO 2024

Ulwiputo ulwakulaba ubwavwilizi

Isalimo ilya Devedi bo akumuchimbila umwana wache u Abisalomu.

¹ Wee Mwene, abakumbenga balipo binji nkani, sona abinji nkani bansambukiye.

² Abinji bakutinji, “U Chala atangamupoka.”

³ Loli wee Mwene awe we ngulu yane, we buchindamu bwane, sona we ukughukazya nkani umoyo wane.

⁴ Nkumwitizya u Mwene umwakukolomoka, po akunyamula bo ali pighamba lyache izelu.

⁵ Nkulambalala nukughona utulo, po nkulamusyanga pakuti u Mwene weyuyo akunsungilila.

⁶ Ntakwiza pakubanyila abalwani napapo bangaba binji nkani, napapo banganzyungulila kumbazu zyosi.

⁷ Wee Mwene vundumuka, wee Chala wane mpoka! Ubakomaye kunjegho abalwani bane bosi, sona ubakulaye amino abantu ababibi.

⁸ Ubupoki bukufuma kwa Mwene, sona ulusayo lwako lubanje pabantu bako.