Masalimo 29 - IBAYIBOLO 2024

Izyu ilya Mwene mumpepo iyamaka

Isalimo ilya Devedi.

¹ Mwee vipeliwa ivya kumwanya, mumupalaye u Mwene, mumupalaye u Mwene pachifukwa icha buchindamu namaka ghache.

² Mubupalaye ubuchindamu pachifukwa icha itabwa lyache, sona mumwiputaye u Mwene bo akwiza mubuchindamu ubuzelu.

³ Izyu ilya Mwene likwivwika pamizi, sona u Chala uwabuchindamu akujilimisya, U Mwene akujilimisya mumayigha aghamaka nkani.

⁴ Izyu ilya Mwene lyamaka, sona izyu ilya Mwene lya bulaghili.

⁵ Izyu ilya Mwene likughapyolannya amakwi agha mwale, u Mwene akughapyolannya amakwi agha mwale agha mu Lebanoni.

⁶ Akumunyelezya u Lebanoni ngati yo ngwata, sona akulinyelezya ighamba ilya helimoni ngati mwana uwa mpogho.

⁷ Izyu ilya Mwene likwaka ngati kamesya.

⁸ Izyu ilya Mwene likuyineng'ennya inkolongo, u Mwene akuyineng'ennya inkolongo iya Kadeshi.

⁹ Izyu ilya Mwene likupyolannya amakwi agha mupandapanda, nukughapupuzya amakwi ghosi. Po bosi bakakolomoka mu Nyumba yache bakati, “Ubuchindamu!”

¹⁰ U Mwene ikaye pachitengo chache icha bumwene pamizi aghakwizula, sona ikaye pachitengo chache icha bumwene bwila na bwila.

¹¹ U Mwene akubapa amaka abantu bache, u Mwene akubasaya abantu bache nu mutende.