Masalimo 28 - IBAYIBOLO 2024

Ulwiputo ulwakulaba ubwavwilizi

Isalimo ilya Devedi.

¹ Wee Mwene nkulila kukwako we lyalabwe lyane, utakabanje ngati we mapuli. Pakuti nanti wabanga bulo myee, nkwiza pakuyana bulo na babo bali mumapumpa.

² Unteghelezyanje bo nkulila ukuti umpelele ichisa sona bo nkulila, nkulaba ubwavwilizi. Unteghelezyanje bo nagholosezya inyobe zyane ku Buzilo bwako Ubuzelu Nkani.

³ Utakanyefyezyanje poka na bantu ababibi, babo bakubomba ivintu ivibibi. Abantu banaba bakunenagha amazyu amiza ku bapalamani babo, loli mumoyo ghabo mwizuye nu lubengo.

⁴ Ubatanizyanje ukuyana ni mbombo zyabo, sona ukuyana ni vintu ivibibi vivyo babombite. Ubatanizye ukuyana na vivyo babombite ni nyobe zyabo, sona ubapanje umuvwalo uwakuyana ni mbombo zyabo.

⁵ Batakuzibikilaghako kumoyo imbombo izya Mwene sona ni mbombo izya nyobe zyache. Po akwiza pakubamongolannya ngati nyumba, sona atakwiza pakubazenga sona.

⁶ U Mwene apaliwanje, pakuti ivwa ukulila kwane ukuti ampelele ichisa.

⁷ U Mwene we maka ghane sona we ngulu yane, po umoyo wane ghumusubiye sona anyavwa. Umoyo wane ghukunyelanyela pachifukwa icha buhobosu, sona nkwiza pakumupala ni nyimbo.

⁸ U Mwene we maka agha bantu bache, sona we lilinga ilyakumupoka umupakiwa wache.

⁹ Ubapokaye abantu bako nukuyisaya impyana yako. Ubanje we mudimi wabo, sona ubasungililaye bwila na bwila.