Masalimo 27 - IBAYIBOLO 2024

Ulwiputo ulwakumupala u Mwene

Isalimo ilya Devedi.

¹ U Mwene we lukozyo lwane sona we bupoki bwane, po intangamunyila nayumoyumo umuntu. U Mwene we lilinga ilya bumi bwane, po ntakwiza pakutetema nalumo.

² Nanti ababomba mbibi bakwiza pakughunangannya umubili wane, nanti abalwani bakundema, bakwiza pakwipunula nukuwa.

³ Napapo abasilikali bangazyungulila, ntakwiza pakunyila napo panandi. Napapo bangalwa nane ubwite, pope bulo nkwiza pakujimba umoyo.

⁴ Ichintu choka chicho nkumulaba u Mwene, chicho nkachilonda nkani chakuti, nikalaye mu Nyumba iya Mwene mumasiku ghosi agha bumi bwane. Umwakuti nennyanje akabonekele akiza aka Mwene, sona nukuti imulondaye mu Nyumba yache.

⁵ Pakuti pakabalilo akantamyo, akwiza pakunsungilila akiza mu Nyumba yache. Akwiza pakunfisa mukasi muchisakasa chache nukumbika pamwanya pilyalabwe itali.

⁶ Po nkwiza pakubapota abalwani bane babo banzyunguliye, sona nkwiza pakubika ichakwiyipa muchisakasa chache nukukolomoka. Nkwiza pakwimba inyimbo izyakumupalizikizya u Mwene.

⁷ Wee Mwene unyivwanje bo nkukwitizya, umpelelaye ichisa nukunyamula.

⁸ Wee Mwene ukambuzya ukati, “Londelezya icheni chane!” Po icheni chako cho chicho nkuchilonda.

⁹ Utakanfisaye icheni chako, utakamuchimbizyanje umubombi wako pachifukwa icha bukalale pakuti waba we mwavwilizi wane. Wee Chala Umupoki wane, utakankanaye pamo ukundeka ne mwene.

¹⁰ Napapo umayi nu tata bandekite nemwene, loli u Mwene akwiza pakunsungilila akiza.

¹¹ Wee Mwene umanyisyanje izila zyako. Undongozezye muzila intenganu, pachifukwa ichakuti abalwani binji.

¹² Utakambikaye munyobe izya balwani bane, pakuti abakaboni abamyasi bansambukiye, umwakuti bakunyoghofya pakumbombela ivibibi.

¹³ Nkusubila ukuti nkwiza pakubwennya ubwiza ubwa Mwene muchisu icha bantu abumi.

¹⁴ Umusubilaye u Mwene. Banga na maka sona ujimbaye, umusubilaye u Mwene.