Masalimo 26 - IBAYIBOLO 2024

Ulwiputo lwamuntu umusita nongwa

Isalimo ilya Devedi.

¹ Wee Mwene umpimaye pakuba ne muntu yuyo atanangite, pakuti naba ne muntu umusita ichilema nachimochimo, sona nakusubiye umwakusita ukwilamwa napo panandi.

² Wee Mwene, njezya nukumpima. Sona ughupime umoyo wane ni nyinong'ono zyane zyope.

³ Pakuti ulughano lwako lukundongozya akabalilo kosi, sona nkuba ne musubiliwa akabalilo na kabalilo.

⁴ Intakwikalagha poka na bantu abamyasi, pamo ukusayana na bazimbuli.

⁵ Inzibengite nkani inkomano izya babomba mbibi sona intakwikalagha pasi poka na bantu ababibi.

⁶ Nkusukusula munyobe zyane ukulanjizya ukuti intanangitepo, loli nkukuchindika pakwenda umwakuzyungulila pachighemo chako.

⁷ Nkwimba inyimbo izyakupalizikizya, nukubabuzya abanji nizya mbombo zyako izyakuswighisya.

⁸ Wee Mwene injighanite inyumba yiyo ukwikalaghamo, mumo muli ubuchindamu bwako.

⁹ Utakanzimizyanje poka na babomba mbibi, pamo ukunangannya poka na baghoghi.

¹⁰ Abantu banaba bakubatika bulo pakubomba ivibibi sona munyobe zyabo mwizuye na mabeko.

¹¹ Loli ane nkwenda muzila ingolosu, po umpokaye sona umpelelaye ichisa.

¹² Inyayo zyane zyimiliye pabuzilo ubutenganu, po nkwiza pakumupalagha palukomano ulukulu nkani.