Masalimo 25 - IBAYIBOLO 2024

Ulwiputo ulwakulaba ubulongozi nu bupoki

Isalimo ilya Devedi.

¹ Wee Mwene nkughukwezya umoyo wane kukwako.

² Wee Chala wane nkusubiye wewe. Utakitikizyanje ukuti nkoziwanje isoni, pamo ukubitikizya abalwani bane ukuti bampotaye.

³ Umuntu yuyo akusubiye atakwiza pakukoziwa isoni nalumo, loli ubakozyanje isoni abantu abakusambuka.

⁴ Wee Mwene undanjizye izila zyako, umanyisyanje ukuti inzimanye.

⁵ Undongozezye mubwanaloli bwako nukumanyisya, pakuti we Chala Umupoki wane, sona nkusubiye wewe isiku lyosi.

⁶ Wee Mwene kumbuka ichisa chako ichikulu nu lughano lwako, pakuti vinivi vikabangako ukwanda kale.

⁷ Wee Mwene, utakazikumbukaye imbibi zizyo nkabomba bo indi mulumendo, sona utakakukumbukaye ukunanga kwane. Nkumbukaye mulughano lwako lulo lutakupotwa nalumolumo pakuti we mwiza.

⁸ U Mwene mwiza sona mugholosu, po akubamanyisya ababomba mbibi izila zyache.

⁹ Akubalongozya abantu abakwiyisya pakubomba ingolosu, sona abakumanyisya izila zyache.

¹⁰ Izila zyosi izya Mwene izya lughano sona nsubiliwa, ku bantu babo bakughasunga amalamulo agha lufingo lwache.

¹¹ Wee Mwene pachifukwa icha wewe, uhobokelaye imbibi napapo nkulu.

¹² Nkimba pali umuntu yumo uwakumunyila u Mwene? Po u Mwene akwiza pakumumanyisya izila izyakuti asale.

¹³ Umuntu yulayula ivintu vyache vikwiza pakumwendelagha akiza, sona abaluko lwache bakwiza pakupyana ichisu.

¹⁴ U Mwene akuba mumanyani uwa bantu babo bakumwivwila, po akubavumbulila ulufingo lwache.

¹⁵ Akabalilo kosi amaso ghane ghakwennyanga pa Mwene, pakuti weyuyo angazipoka inyayo zyane muchipingo.

¹⁶ Ghalabukila kukwane nukumpelela ichisa, pakuti indi nemwene bulo sona nkuyimba nkani.

¹⁷ Intamyo izya mumoyo wane zyabala, unyefyemo mumayimba ghane.

¹⁸ Zyennye intamyo na mayimba ghane, sona unhobokelaye imbibi zyane zyosi.

¹⁹ Ennya namumo bubeleye ubwinji ubwa balwani bane, sona ennya namumo bambengeye.

²⁰ Ubusungililaye ubumi bwane, sona umpokaye. Intakakoziwanje isoni pakuti nkuchimbilila kukwako.

²¹ Ubwiza nu bugholosu vinvighililaye akiza, pakuti nkusubiye wewe.

²² Wee Chala, ubapokaye aba Izilayeli kuntamyo zyabo zyosi.