Masalimo 24 - IBAYIBOLO 2024

U Mwene uwa buchindamu

Isalimo ilya Devedi.

¹ Ichisu ichapasi ni vintu vivyo vili mumo vya Mwene, ichisu chosi ichapasi poka na bantu babo bakwikala mulamula.

² Pakuti akachizenga panyanja sona akachikazya pamwanya pamizi.

³ Nkimba wewenu yuyo angakwela pighamba ilya Mwene? Nkimba wewenu yuyo angimilila pabuzilo bwache ubuzelu?

⁴ Kokuti muntu yuyo inyobe zyache swepu, sona umoyo wache ghope mugholosu. Yunuyu we muntu yuyo atakubikilako umoyo wache pavintu ivyabulo, pamo ukulapa ivyabumyasi.

⁵ Akwiza pakupokela ulusayo ulwa Mwene sona u Chala Umupoki wache weyuyo akwiza pakunena ukuti ate ninongwa.

⁶ Iyi yo nkulilo iya bantu babo bakumulondelezya u Mwene, kokuti abantu babo bakuchilondelezya icheni icha Chala uwa Yakobo.

⁷ Mwee milyango ighuka! Ighuka mwe inyiyi izyakale, umwakuti u Mwene uwa buchindamu injilayemo.

⁸ Nkimba u mwene uwa buchindamu wewenu? We Mwene uwamaka sona nu wamaka ghosi. We Mwene Uwamaka pakulwa ubwite.

⁹ Mwee milyango ighuka. Mwe inyiyi izyakale ighuka, umwakuti u Mwene uwabuchindamu injilaye.

¹⁰ Nkimba u mwene uwa buchindamu wewenu? We Mwene Uwamaka Ghosi, we mwene uwa buchindamu.