Masalimo 22 - IBAYIBOLO 2024

Amayimba na mapalo

Kumulongozi uwa bwimbi. Ukuyana nu lwimbo ulwakuti, “Imbabala iya pandabindabi.” Isalimo ilya Devedi.

¹ Chala wane, Chala wane, nkimba choni chicho wandeka nemwene? Nkimba choni chicho utakunyavwa sona nkimba choni chicho utakwivwa ukukoloma kwane?

² Wee Chala wane pamusanya nkulila, loli utakunyamula, pabusiku intakupuma sona ntakutuzyapo napo panandi.

³ Loli pope bulo we Muzelu, yuyo ikaye pachitengo icha bumwene, po aba Izilayeli bakukupalagha.

⁴ Abanyenya bitu bakakusubilagha, po ukabapoka pakuti bakakusubila.

⁵ Bakakulililagha, po ukabapoka. Bakakusubila, po batakakoziwanga isoni.

⁶ Loli ane ne somi bulo, te ne muntu, abantu bakuntuka nukunsamula.

⁷ Bosi babo bakunyennya bakunyobezya, sona bakusumba intuko papane nukupukunnya imitu yabo.

⁸ Bakuti, “Amusubiye u Mwene muleke amupokaye, muleke amupokaye pakuti ahobokite nawe.”

⁹ Loli wewe ukitikizya ukuti impapiwe, bo inchili inkonka bulo, ukansungilila ukuti nivwanje akiza.

¹⁰ Ukwanda po pakupapiwa kwane nkaba munyobe zyako, sona waba we Chala wane ukwanda papo umayi wane akampapilagha.

¹¹ Utakabanje kubutali nane, pakuti intamyo zili papipi nane, sona atalipo nayumoyumo umuntu uwakunyavwa.

¹² Abalwani ngati nkambaku inyinji banzyunguliye, abalwani abamaka ngati nkambaku mu Bashani banzyunguliye.

¹³ Zikunyasamila amalomo ngati zyo nkalamu izya kubuluma, zizyo zikulonda pakunkavulannya.

¹⁴ Ubumi bwane bukupukiye pasi ngati mizi, sona amafupa ghane ghosi ghavyughuka. Umoyo wane wasunguluka ngati lipula, wasunguluka mukasi mumwane.

¹⁵ Amaka ghane ghumiye ngati lwinga, lope ululimi lwane lukakatiye ku njegho zyane. Wandambalizizye mulufumbi ukuti infwilaye mulamula.

¹⁶ Abalwani banzyuguliye ngati mbwa, sona akabukatila aka bantu ababibi kanzyunguliye. Bandasa inyobe ni nyayo zyane bulo.

¹⁷ Amafupa ghane ghosi ghali pabuzelu, sona abantu bakunyenelezya nukunyobezya.

¹⁸ Bakugabana amenda ghane, sona bakupanga amayele pachakuvwala chane.

¹⁹ Loli wee Mwene wane utakabanje kubutali nane. Wee maka ghane zagha lubilolubilo unyavwe.

²⁰ Poka ubumi bwane kwa panga, sona ubumi bwane ubwapamwanya munyobe izya mbwa izyamaka.

²¹ Umpokaye kumilomo iya nkalamu, sona impokaye ku mpembe izya mpogho.

²² Nkwiza pakufumusya itabwa lyako pakasi pa bakamu bane, sona nkwiza pakulipalagha itabwa lyako palukomano.

²³ Amwe mwe mukumuchindika u Mwene, mupalaye, sona mwebosi mwe baluko ulwa Yakobo, mumuchindikaye! Mumuchindikaye amwe mwebosi mwe baluko ulwa Izilayeli.

²⁴ Pakuti atamusulitepo pamo ukumukana umuntu yuyo akuyimba pachifukwa icha ntamyo. Atamufisitepo icheni chache, loli ateghelezya bo akulila ukuti amwavwe.

²⁵ Nkwiza pakukupalagha palukomano ulukulu nkani, sona nkwiza pakukwanilisya ichilapo chane pamaso pabantu babo bakukuchindika.

²⁶ Abapina bakwiza pakulyanga nukwikuta, sona babo bakumulondelezya u Mwene bakwiza pakumupala ukuti, “Amoyo ghinyu ghabanjeko bwila na bwila.”

²⁷ Abantu aba inko zyosi pachisu ichapasi bakwiza pakukumbuka, sona bakwiza pakunyokela kukwache. Po abantu aba inko izinji bakwiza pakufughama pamaso papako.

²⁸ Pakuti u Mwene we mwene, sona akuzilaghila inko zyosi.

²⁹ Abakabi bosi bakwiza pakuba nu lusekelo nukwiputa, Bosi babo bakusyiliwa mwipumpa bakwiza pakumufughamilila kokuti bosi babo batangisungilila bene pakuba bumi.

³⁰ Abaluko bakwiza pakumubombelagha sona inkulilo intazi zikwiza pakubuziwa nizya Mwene.

³¹ Bakwiza pakulumbililagha nizya bugholosu bwache, ku bantu babo bachili batapapiwe, bakwiza pakwivwa zyosi zizyo abomba.