Masalimo 21 - IBAYIBOLO 2024

Ukumupalizya u Mwene pachifukwa icha bupoti

Kumulongozi uwa bwimbi. Isalimo ilya Devedi.

¹ Wee Mwene, u mwene akusekela pachifukwa icha maka ghako, akuhoboka nkani pachifukwa icha ubupoti bubo ukumupanga.

² Wamupa vivyo umoyo wache ghukuvinyonywanga, sona utakamwimagha zizyo akulaba nu mulomo wache.

³ Ukamwizila nu lusayo ulukulu nkani, sona ukamuvwika impumpu iya golide umwenecho kumutu wache.

⁴ Bo akukulaba ubumi, ukamupa, sona ukumupa ubumi ubutali ubwa bwila na bwila.

⁵ Ubuchindamu bwache bukulu nkani, pakuti ukamupa ubupoti, sona ukamupa ubuchindamu nu muchizi.

⁶ Naloli wamupanga ulusayo ulwa bwila na bwila, sona umupiye ubuhobosu nu lusekelo pachifukwa ichakuti uli nawe.

⁷ Pakuti u mwene amusubiye u Mwene Uwamaka Ghosi, po atakwiza pakuyingana, pachifukwa icha lughano ulwa Uwakumwanya Nkani, lulo lutakumala nalumolumo.

⁸ Inyobe yako yikwiza pakubapota abalwani bako, inyobe yako indilo yikwiza pakubalema babo bakubengite.

⁹ Pakabalilo kako ukwiza pakubonekela, ukwiza pakubapela ngati cho chiliba icha moto. Mubukali bwache u Mwene akwiza pakubazimizya, sona umoto wache ghukwiza pakubalungulizya.

¹⁰ Ukwiza pakubazimizya abana babo pachisu ichapasi, abaluko lwabo bakwiza pakumala pakasi pabantu bosi.

¹¹ Bakubatika pakukubombela imbibi, pamo nanti bakwivwana pakubomba ububibi, bakwiza pakupotwa.

¹² Ukwiza pakubachimbizya bo ukubalasa nu tulasilo twako.

¹³ Wee Mwene upaliwanje pachifukwa icha maka ghako, sona tukwiza pakukwimbilagha inyimbo izyakughapalizikizya amaka ghako.