Masalimo 20 - IBAYIBOLO 2024

Ukulaba amaka aghakupotela

Kumulongozi uwa bwimbi. Isalimo ilya Devedi.

¹ U Mwene akwavwanje pakabalilo akantamyo, u Chala uwa Yakobo akuvighililaye.

² Akwavwanje bo ali mubuzilo bwache ubuzelu, sona akutumilaye ubwavwilizi bo ali mu Ziyoni.

³ Avipokelaye ivyakwiyipa vyako vyosi, sona ahobokaye ni vyakwiyipa vyako vyosi ivyakocha.

⁴ Akupanje vivyo umoyo wako ghukuvinyonywa, sona akwanilisyanje imbatiko zyako zyosi.

⁵ Tukwiza pakusekelagha pachifukwa icha bupoti bwako, sona tukwiza pakukwezya indembela zyitu mwitabwa ilya Chala witu. U Mwene akupanje ivintu vyosi vivyo walaba.

⁶ Losi ulu nazimanya ukuti u Mwene akumupoka umupakiwa wache. Bo ali kubuzilo bwache ubuzelu kumwanya, akumwamulagha, sona akumupoka na maka amakulu agha nyobe yache indilo.

⁷ Abanji bazisubiye ingolo izya bwite, sona bamo bazisubiye ifalasi. Loli aswe tulisubiye itabwa ilya Mwene u Chala witu.

⁸ Abantu banaba bakwiza pakwipunula nukuwa pasi, loli aswe tukwiza pakunyamuka nukwimilila.

⁹ Wee Mwene umupokaye u mwene, sona utwamulaye bo tukukwitizya.