Masalimo 2 - IBAYIBOLO 2024

Nizya Mwene umupakiwa uwa Chala

¹ Nkimba choni chicho inko zikubatika pakusambuka? Sona nkimba choni chicho abantu bakubatika ivintu vivyo vitangabavwa?

² Abamwene aba pachisu ichapasi basambukite, sona bope abalaghili babunganite poka pakumusambukila u Mwene poka nu Mupakiwa wache.

³ Bakutinji, “Zagha tubudumulaye ubunyololo bwabo, sona zagha tuzisatulaye inkusa zyabo.”

⁴ Yuyo ikaye kumwanya akubaseka, sona u Mwene akubobezya.

⁵ Po mubukalale bwache akubachemela, sona akuboghofya mubukali bwache.

⁶ Akutinji, “Namwimika u mwene wane mu Ziyoni, lilyo lighamba lyane izelu.”

⁷ Nkwiza pakuzifumusya indaghilo izya Mwene ukuti, “Awe we mwana wane, ilelo naba ne ghuso.

⁸ Undabe wennye, nkwiza pakukupa inko pakuba mpyana yako, sona ichisu chosi ichapasi chikwiza pakuba chako.

⁹ Ukwiza pakubakoma ni ndisa iya chela, sona ukwiza pakubafwantannya ngati yo sonta.”

¹⁰ Polelo mwee bamwene, mubanje na mahala, mwee balaghili aba pachisu ichapasi, muchebaye.

¹¹ Mumubombelaye u Mwene nubogha sona muhobokaye nukutetema.

¹² Mumuchindikaye lumo angabakalalila nukubanangannya, pakuti ubukali bwache bukwaka lubilolubilo. Basayiwa bosi babo bakuchimbilila kukwache.