Masalimo 19 - IBAYIBOLO 2024

Ubuchindamu ubwa Chala muvipeliwa nu lulaghilo

Kumulongozi uwa bwimbi. Isalimo ilya Devedi.

¹ Kumwanya kukulumbililagha ubuchindamu ubwa Chala, sona mumwanya mukunena ni mbombo izya nyobe zyache.

² Isiku ni siku vikufumusyanga amazyu, ubusiku nu busiku vikunenagha nizya mahala ghache.

³ Kutaliko ukunena pamo amazyu, Izyu lyabo litivwikite.

⁴ Izyu lyabo likubuka kuchisu chosi ichapasi, amazyu ghabo ghakufika mupaka kubumalilo ubwa chisu ichapasi. Kumwanya alizengeye izuba ichisakasa.

⁵ Izuba linili lili ngati mwenesendwa, uwakufuma muchipinda chache sona likwenda umwakuhoboka ngati muntu uwamaka yuyo apotite.

⁶ Likufuma kubumalilo boka ubwa kumwanya nukuzyungulila mupaka kubumalilo ubunji. Sona chitalipo nachimochimo ichintu chicho chikuvwama ubutukizu bwache.

⁷ Ululaghilo ulwa Mwene lwakufikapo, lukutupa sona ubumi ubupya. Amalamulo agha Mwene masubiliwa, ghagho ghakubapa amahala abantu babo bate nagho.

⁸ Ivimanyisyo ivya Mwene vigholosu vivyo vikughasangalusya amoyo. Amalamulo agha Mwene miza, ghagho ghakughapa amaso ulukozyo.

⁹ Ukumunyila u Mwene cho chintu chakufikapo chicho chikubangako bwila. Ubulongi ubwa Mwene busubiliwa po vyosi vigholosu.

¹⁰ Miza nkani ukumuchila ugolide, sona ukumuchila ugolide umwenecho. Manoni nkani ukubuchila ubuchi, ukubuchila ubuchi ubwa muchitenga.

¹¹ Umubombi wako akusokiwanga ni ndaghilo zinizi, sona muli umuvwalo umukulu nkani pakughasungilila.

¹² Nkimba wewenu yuyo angakumanya ukupuvya kwache? Uhobokelaye ukupuvya kwane kuko kufisiwe.

¹³ Utakitikizyanje ukuti umubombi wako anangaye madinko bulo, sona utakitikizyanje ukuti imbibi zindaghilaye. Po nkwiza pakuba ne muntu yuyo ate ni chilema nachimochimo, sona yuyo atabuka kumbibi inkulu nkani.

¹⁴ Amazyu ni nyinong'ono izya mumoyo wane vikuhobosyanje, wee Mwene, we lyalabwe lyane, sona we mutabuli wane.