Masalimo 18 - IBAYIBOLO 2024

Ulwimbo ulwabupoti ulwa Devedi

Kumulongozi uwa bwimbi. U Devedi umubombi uwa Mwene akamwimbila ulwimbo pisiku lilyo u Mwene akamupoka munyobe izya Sabuli, sona na munyobe izya balwani bache.

¹ Wee Mwene, we maka ghane nkughanite nkani.

² U Mwene we lyalabwe lyane we lilinga lyane, sona we mupoki wane. U Chala wane we lyalabwe lyane, mumo nkuponelamo. We ngulu yane ni mpembe yane, iya bupoki bwane, sona we lilinga lyane.

³ Nkumwitizya u Mwene pakuti amapalo ghamubaghiliye, po akumpoka munyobe izya balwani bane.

⁴ Impote izya bufwe zyampinya, sona amayigha aghakunangannya ghanyibizya.

⁵ Impote izya lipumpa zyampinya, sona ubufwe bukuntegha ni vipingo.

⁶ Bo indi mumayimba, nkamwitizya u Mwene, sona nkamulililagha u Chala wane ukuti anyavwe. Akanyivwanga bo ali mu Nyumba yache, sona ukulila kwane kukivwikagha mumakutu ghache.

⁷ Ichisu ichapasi chikatetemagha nukukayingana, sona ulwalo ulwamaghamba lukayinganagha, pachifukwa ichakuti akakalala.

⁸ Mumpuno zyache mukasukagha ilyosi, umoto uwakulungulizya ghukafumagha mumulomo wache, sona amazimwa aghakwaka ghakafumagha mumulomo wache mula.

⁹ Akazepula kumwanya nukwika pasi, sona amabingu amafitu ghakaba kusi kunyayo zyache.

¹⁰ Akakwela pa bakelubi nukubuluka sona akaba mwengo nkani bo ali pavipapande ivya mpepo.

¹¹ Ichisi akachipela pakuba cho chakuvwinka chache, sona amabingu amafitu ghakamukupikilagha.

¹² Pachifukwa icha kulama kuko kukaba pamaso papache mukafuma ivula iya mabwe numoto uwa mazimwa.

¹³ U Mwene akajilimisya kumwanya, sona izyu ilya Uwakumwanya Nkani likivwika.

¹⁴ Akatusumba utulasilo twache nukubanyampannya abalwani bache, sona utumesya utukulu nkani tukabachimbizya.

¹⁵ Amakombe agha nyanja ghakaba pabuzelu. Ulwalo ulwa chisu ichapasi lukabonekela pabuzelu. Bo u Mwene akubachemela abalwani bache, sona bo akulufutila nu muyi uwa mumpuno zyako.

¹⁶ Bo u Mwene ali kumwanya akagholosya inyobe yache nukundema, sona akanzubula mumizi amibizu.

¹⁷ Akampoka munyobe izya balwani bane abamaka, munyobe izya bakumbenga babo banchilite amaka.

¹⁸ Abalwani bane bala bakalwanga nane ubwite bo indi muntamyo inkulu nkani. Loli u Mwene akanvighilila.

¹⁹ Akanyefya mubupalapala, akampoka pachifukwa ichakuti akahoboka nane.

²⁰ U Mwene akampa umuvwalo ukuyana ni mbombo zyane ingolosu. Akansaya ukuyana ni nkalo yane inyiza.

²¹ Pakuti nazikonkagha indaghilo izya Mwene, sona intabombitepo nayimo imbibi nukumukana u Chala wane.

²² Ane nazikonka indaghilo zyache zyosi, sona intavisulitepo ivimanyisyo vyache.

²³ Ane inte ninongwa nayimoyimo pamaso papache, sona nkazileghuka imbibi.

²⁴ U Mwene ampa umuvwalo ukuyana nu bugholosu bwane, Akampa umuvwalo pachifukwa ichakuti ntenakalema nakamokamo pamaso papache.

²⁵ Ku bantu abasubiliwa, ukubanga we musubiliwa. Ku bantu abasita nongwa, utakubanga nichilema nachimochimo.

²⁶ Ku bantu abazelu, ukubanga we muzelu, loli ku bantu abanyonganu, ukubanga we muchevu nkani.

²⁷ Awe ukubapoka abantu abakwiyisya, loli abantu abakwikwezya, ukubisya.

²⁸ Wee Mwene wewe ukuyipela inyale ukuti yakaye, u Chala wane akuchipela ichisi chane pakuba lukozyo.

²⁹ Nu bwavwilizi bwako ningakapota akabukatila aka basilikali, nu bwavwilizi ubwa Chala wane ninganyela ulupaso.

³⁰ Izila izya Chala witu zyakufikapo, sona amazyu agha Mwene ghanaloli. We ngulu iya bosi babo bakuchimbilila kukwache.

³¹ Pakuti ataliko u Chala uyunji, loli u Mwene weka mpela. Litalipo ilyalabwe ilyakuvwamamo, loli u Chala weka mpela.

³² We Chala yuyo akumpanga amaka sona weyuyo akunyefyezya ivibibi muzila yane.

³³ Inyayo zyane akuzipela pakuba ngati zya mbabala, sona akunsunga akiza bo indi mumaghamba.

³⁴ Akuzimanyisya inyobe zyane pakulwa ubwite, umwakuti ningabombezya ubwele ubwa mukuba.

³⁵ Ukunvighilila ni ngulu yako iya bupoki, inyobe yako indilo yanyavwanga, ubwavwilizi bwako bwankwezya.

³⁶ Wankuzizya izila ukuti nendemo akiza, umwakuti inyayo zyane zitakatyelemukaye.

³⁷ Nkabachimbizya abalwani bane nukubalema, sona intakanyokela mupaka nkabazimizya.

³⁸ Nkabavulazya nkani umwakuti batakanyamuka sona, nkabakanyilila ni nyayo zyane.

³⁹ Awe ukumpa amaka aghakulwila ubwite, sona ukabapela abalwani bane ukuti banfughamililaye.

⁴⁰ Ukabapela abalwani ukuti banchimbilaye, sona nkabanangannya abakumbenga bosi.

⁴¹ Bakalilagha ukuti abavwe, loli patakabapo nayumoyumo umuntu uwakubapoka. Bakalilagha kwa Mwene, loli atakabamula.

⁴² Nkabasya ngati lufumbi lulo lukupupuziwa ni mpepo, sona nkabakanyankila ngati matope agha mumusebo.

⁴³ Wampoka munyobe izya bantu bane, babo bakansambukila sona wambika pakuba ne mutu uwa inko, Abantu babo intakabamanya ilelo bali pasi pabulaghili bwane.

⁴⁴ Bo bivwa bulo nizya ane bakanyivwila abayeni pakanyilagha.

⁴⁵ Abantu bosi bakaba nubogha, sona bakafuma mumalinga ghabo, bo bakutetema.

⁴⁶ U Mwene umumi, apaliwanje Ilyalabwe lyane. Achindikiwanje u Chala Umupoki wane.

⁴⁷ We Chala yuyo akuntanizizya, umwakuti akunyavwa pakuzipota inko izinji.

⁴⁸ Akumpoka munyobe izya balwani bane. Ukankwezya pamwanya pa balwani bane, sona ukampoka munyobe izya bantu abavyongo.

⁴⁹ Wee Mwene, Po nkwiza pakukupala, pakasi pa inko zyosi. Nkwiza pakwimba inyimbo izyakulichindika itabwa lyako.

⁵⁰ Akumwavwanga u mwene wache ukuti apotaye, akumupelelagha ichisa umupakiwa wache, u Devedi poka na baluko lwache bwila na bwila.