Masalimo 17 - IBAYIBOLO 2024

Ulwiputo ulwa muntu yuyo ate ninongwa

Ulwiputo ulwa Devedi.

¹ Wee Mwene teghelezya, bo nkulaba, sona ivwa ukulila kwane! Ivwa ulwiputo lwane lulo lukufuma mumulomo uwanaloli.

² Dumula ukuti ane inte ninongwa, ghope amaso ghako ghabwennyanje ubwanaloli.

³ Napapo ungaghuyela umoyo wane, pamo ukumpima pabusiku, loli utanganyagha ninongwa nayimoyimo. Nadumula ukuti umulomo wane ghutakwiza pakunanga.

⁴ Intakubomba imbibi ngati mumo bakubombelagha abanji. Naghivwila amalamulo ghako, sona intakubomba ngati mumo bakubombelagha abantu abavyongo.

⁵ Akabalilo kosi inyayo zyane zyakonkagha izila zyako, sona inyayo zyane zitatyelemukitepo.

⁶ Wee Chala, nkukwitizya pakuti ukwiza pakunyamula, unteghelezyanje sona ivwa ulwiputo lwane.

⁷ Vumbula ulughano lwako ulukulu, sona wewe ukumpoka ni nyobe yako indilo, babo bakuchimbilila kukwako pakwipoka kubalwani babo.

⁸ Unsungililaye ngati po ne mboni iya lyiso, unfisaye kusi kuvipapande vyako.

⁹ Utakabitikizyanje abantu ababibi ukuti bangoghe, abalwani bane abakoghofya babo bazyunguliye.

¹⁰ Batakulanjizya ichisa napo panandi, sona amalomo ghabo ghakunena amituvyo ghene.

¹¹ Bakumbinga sona bazyunguliye, bakunyenelezya ukuti bangwisye.

¹² Bali ngati nkalamu yiyo yikulonda pakukavulannya, sona bali ngati mwana uwa nkalamu, yuyo anyonyotaye pakuvwamilila.

¹³ Wee Mwene vundumuka, ubapotaye nukubawisya pasi, sona bombezya upanga wako umpokaye munyobe izya bantu ababibi.

¹⁴ Wee Mwene na maka ghako, mpoka munyobe izya bantu banaba. Mpokagha munyobe izya bantu aba muchisu ichapasi, babo umuvwalo wabo ghuli mubumi bunubu. Ubafundaye ni vyakubaba vivyo ubasungiye. Abana babo babanje navyo ivyinji nkani, ukuti vibakwanaye abana babo.

¹⁵ Loli ane nkwiza pakuchennya icheni chako, pakuti inte ninongwa nayimoyimo. Bo nalamusya nkwiza pakuhoboka nkani pakuti nkwiza pakwenannya nawe.