Masalimo 16 - IBAYIBOLO 2024

Ulwiputo ulwalwitiko

Isalimo ilya Devedi.

¹ Wee Chala unsungililaye, pakuti nkuchimbilila kukwako.

² Nkamubuzya u Mwene nkati, “Awe we Mwene wane sona ivyiza vyosi vivyo indi navyo wewe ukumpa.”

³ Pakuti abantu abazelu babo bali pachisu ichapasi, bo bantu bachindikiwa babo nkuhoboka nabo.

⁴ Abantu babo bakusala pakubiputa abachala abanji bakwipalaghulila bene intamyo. Ntakwiza pakusendapo ichigaba pa vyakwiyipa vyabo, pamo ukughatambula amatabwa agha bachala babo.

⁵ Wee Mwene awe we mpyana yane, sona we lubako lwane lwalusayo, po intazi yane yili munyobe zyako.

⁶ Impaka iya buzilo bwane yaba nyiza, naloli napokela ichilingo ichiza

⁷ Nkumupala u Mwene pakuti weyuyo akumanyisya amahala, umabyebye wane akunsokagha na pabusiku bulo.

⁸ Nkamwennyanga akabalilo kosi u Mwene pamaso papane, pakuti ali kunyobe yane indilo, po ntakwiza pakuyingana.

⁹ Polelo umoyo wane wahoboka, sona umuzimu wane ghukusekela, umubili wane ghope ghukwiza pakutuzya umwakufwasa.

¹⁰ Pakuti utakwiza pakundeka muchisu icha bantu abafwe, sona utakwiza pakwitikizya ukuti ne mubombi wako umusubiliwa imbolaye.

¹¹ Wandanjizya izila iyakubukila kubumi, sona ukwiza pakunyizuzya nu buhobosu Sona nkwiza pakuhoboka bwila na bwila kunyobe yako indilo.