Masalimo 149 - IBAYIBOLO 2024

Ulwimbo ulwa mapalo

¹ U Mwene apaliwanje. Mumwimbilaye u Mwene ulwimbo ulupya. Sona mumupalaye palukomano ulwa bantu bache abasubiliwa.

² Aba Izilayeli basekelaye, pachifukwa icha Mupeli wabo, abantu aba mu Ziyoni bahobokaye pachifukwa icha Mwene wabo.

³ Balipalaye itabwa lyache bo bakujina, sona bimbaye inyimbo pakulilizizya ivisekeseke, ni vinanda.

⁴ Pakuti u Mwene akuhoboka na bantu bache, sona abakwiyisya akubapa ubupoki.

⁵ Abantu abasubiliwa basekelaye pachifukwa icha buchindamu bwache, sona bimbaye umwakuhoboka nu lusekelo bo balambalaye pavitala vyabo.

⁶ Bakolomokaye bo bakumupala u Chala namalomo ghabo, sona bo balemite munyobe zyabo upanga yuyo akwete kosi na kosi,

⁷ ukuti abatanizye abantu aba inko izinji, nukubafunda abantu abanji bosi,

⁸ pakubapinya abamwene babo ni mpingu, sona nukubapinya ni minyololo abantu abachindikiwa,

⁹ pakubapa ulufundo ukuyana namumo u Chala akalamulila. Bunubu bo buchindamu ubwa bantu bache abasubiliwa bosi. U Mwene apaliwanje.