Masalimo 148 - IBAYIBOLO 2024

Ivipeliwa vyosi vimupalaye u Mwene

¹ U Mwene apaliwanje. Mumupalaye u Mwene ukufuma kumwanya, sona mumupalaye bo muli kumwanya nkani.

² Mwee bantumi bache mwebosi, mumupalaye, mwee basilikali bache aba kumwanya, mumupalaye.

³ Wee lizuba nu mwezi, mumupalaye, mwee ntondwa mwe mukulama, namwe mumupalaye.

⁴ Wee kumwanya nkani, umupalaye, sona mwee mizi agha kumwanya nkani, namwe mumupalaye.

⁵ Vyosi vilipalaye itabwa ilya Mwene, pakuti bo alamula bulo, vyosi vikapeliwa.

⁶ Akavyikazya mubuzilo bwache bwila na bwila, sona akabika ilamulo lilyo litanganduliwa.

⁷ Mumupalaye u Mwene, ukufuma pachisu ichapasi, namwe mwe vipeliwa ivikulu nkani ivya munyanja, sona ni nyanja zyosi inyibizu nkani,

⁸ nawe kamesya ni vula iya mabwe nu kabefu sona na mabingu ni mpepo iyamaka mwe mukukwanilisya indaghilo izya Mwene,

⁹ mwee maghamba nu tumaghamba na makwi agha vikomwanagha mwale

¹⁰ mwe vinyamana ivya munkolongo ni vitekwa vyosi nu tunyamana utunandinandi poka ni viyuni vyosi,

¹¹ mwe bamwene aba pachisu ichapasi, sona na bantu aba inko izinji zyosi, na bana aba bamwene, na balongozi bosi aba muchisu ichapasi!

¹² Mwe balumendo na balindu, sona na baghosi, poka na bana bulo!

¹³ Balipalaye itabwa ilya Mwene, pakuti itabwa lyache lyene lyo lyapamwanya. Ubuchindamu bwache buli pachisu ichapasi, sona na kumwanya bulo.

¹⁴ Abakwezya abantu bache, pakubapa amaka, abantu bache abasubiliwa ukuti bamupalaye, u Izilayeli yuyo wapamoyo wache. U Mwene apaliwanje.