Masalimo 147 - IBAYIBOLO 2024

Ukumupala u Mwene Uwamaka Ghosi

¹ U Mwene apaliwanje. Mwee, cho chintu ichiza nkani pakumwimbila amapalo u Chala witu. Cho chintu ichakuhobosya nkani sona ni chakubaghila pakumupala.

² U Mwene akukazenga sona akaya akakulu nkani aka Yelusalemu, sona akubabungannya aba Izilayeli babo banyampanite kuchisu icha buzya.

³ Akubapozya babo bavulaye amoyo, nukubapinya ivilonda vyabo.

⁴ Abumenye ubwinji ubwa ntondwa, nukulwita ulutondwa losi itabwa lyache.

⁵ U Mwene witu mukulu sona wamaka, amahala ghache ghate ni mpaka.

⁶ U Mwene akubakwezya abantu abakwiyisya, loli akubisya pasi abantu ababibi.

⁷ Mumwimbilaye u Mwene ninyimbo izyakupalizikizya, sona lizya ichinanda pakumwimbila u Chala witu.

⁸ Kumwanya akukuvwinka na mabingu, nukutimizya ivula pachisu ichapasi, sona akumezya isote mumaghamba.

⁹ Akuvipa ivinyamana ichakulya, sona nanti utwana utwa chigobe tukulila akutupanga ichakulya.

¹⁰ Amaka agha falasi ghatakumuhobosya atakughalonda nkani amaka agha bantu.

¹¹ U Mwene akuhoboka na bantu babo bakumuchindika, sona abantu babo balusubiye, ulughano lwache, lulo lutakupotwa nalumolumo.

¹² Wee Yelusalemu, umuchindikaye u Mwene, wee Ziyoni umupalaye u Chala wako!

¹³ Pakuti weyuyo akuzikazya impingwi izya milyango yako, nukubasaya abantu babo bali mumwako.

¹⁴ Akupela umutende mumpaka zyako, sona akukwikutisya nu busu ubutinye ubwa ngano.

¹⁵ Akuchipa amalamulo ichisu ichapasi, po amazyu ghache mengo.

¹⁶ Akupa ukabefu ngati meya, akuyinyampannya inganda ngati litoyi

¹⁷ Akuwisya amabwe agha vula ngati po mabwe bulo. Nkimba wewenu yuyo angajimba nu bukatazu bwache?

¹⁸ Akulamula bulo po ghakusunguluka, impepo yikuputa pamizi, aghene ghakwenda.

¹⁹ Akumuvumbulila u Yakobo amazyu ghache, sona akubamanyisya aba Izilayeli indaghilo na malamulo ghache.

²⁰ Atababombeyepo zinizi abantu aba uluko ulunji, sona batazimenye indaghilo zyache. U Mwene apaliwanje.