Masalimo 146 - IBAYIBOLO 2024

Ulwimbo ulwakumupala u Chala Umupoki

¹ U Mwene apaliwanje. Wee muzimu wane, umupalaye u Mwene.

² Nkwiza pakumupala u Mwene mubumi bwane bosi. Nkwiza pakumwimbila u Chala wane bo inchili ne mumi.

³ Utakabasubilaye abalongozi pamo umuntu, sona yuyo atangakupoka napo panandi.

⁴ Nanti umuntu afwa, akunyokela kwitope, po pisiku lilalila imbatiko zyache zikumalila palapala.

⁵ Musayiwa umuntu yuyo umwavwilizi wache we Chala uwa Yakobo, yuyo amusubiye u Mwene u Chala wache,

⁶ umupeli uwakumwanya ni chisu ichapasi, poka ni nyanja na vyosi vivyo vili mulamula u Mwene musubiliwa bwila na bwila.

⁷ Akubabombela mubwanaloli babo bakuyivyiwa, sona akubapa ichakulya babo bali nizala. U Mwene akubasatula abakayidi.

⁸ U Mwene akubighula amaso abafwamaso, u Mwene akubakwezya babo bakwipunula, sona abaghanite abagholosu.

⁹ U Mwene akubasungilila abayeni, sona akubavwa abana abalanda na bakolo abafwilwe, loli akubavulungannya abantu ababibi.

¹⁰ U Mwene akulaghila bwila na bwila, wee Ziyoni, u Chala wako akulaghila kunkulilo zyosi. U Mwene apaliwanje.