Masalimo 145 - IBAYIBOLO 2024

Ulwimbo ulwa mapalo

Isalimo ilya Devedi ilyakupalizikizya.

¹ Wee Chala wane sona Mwene wane, nkwiza pakukupalagha. Nkwiza pakulipala itabwa lyako bwila na bwila.

² Isiku ni siku nkwiza pakukupala, nukulichindika itabwa lyako bwila na bwila.

³ U Mwene we mukulu, sona amapalo ghamubaghiye, Atalipo umuntu nayumoyumo yuyo angabwivwisya ubukulu bwache.

⁴ Inkulilo yoka yikwiza pakuyibuzya inkulilo iyinji, sona bakwiza pakufumusya imbombo zyako izyamaka.

⁵ Bakwiza pakunena nizya buchindamu nu bumwene bwako, po ane nkwiza pakuzyinong'onela imbombo zyako izyakuswighisya.

⁶ Bakwiza pakulingannya nizyamaka ghako aghakuswighisya, po nkwiza pakufumusya nizya mbombo zyako izyamaka.

⁷ Bakwiza pakusekela pachifukwa icha bwiza bwako, nukwimba inyimbo umwakuhoboka, pachifukwa icha bugholosu bwako.

⁸ U Mwene, wachisa sona wachililizi, atakukalala mwalwemwalwe, sona uwa lughano lulo lutakupotwangapo nalumolumo.

⁹ U Mwene mwiza ku bantu bosi, sona ali ni chililizi pavipeliwa vyache vyosi.

¹⁰ Wee Mwene, ivya bumi vyosi vikwiza pakukupala bope abantu bako abazelu bakwiza pakukuchindika.

¹¹ Bakwiza pakunena nizya buchindamu nu bumwene bwako, sona nizyamaka ghako,

¹² umwakuti abantu bosi bamanye imbombo zyako izyamaka, sona nu buchindamu ubwa bumwene bwako.

¹³ Ubumwene bwako bo bumwene ubwa bwila na bwila, sona ubulaghili bwako bukubangako inkulilo zyosi. U Mwene akukwanilisya vyosi vivyo akulayizya sona avighanite nkani vyosi vivyo akavipela.

¹⁴ U Mwene akubavwa abantu bosi babo bakuwa, sona akubakwezya bosi babo bakwipunula.

¹⁵ Ivipeliwa vyosi vikusubiye wewe, po ukuvipa ichakulya pakabalilo kache.

¹⁶ Inyobe yako yikupa, sona yikupa icha bumi chosi chicho chikulonda.

¹⁷ U Mwene mugholosu mumbombo zyache zyosi, po avighanite ivintu vyosi vivyo akavipela.

¹⁸ U Mwene akuba papipi na bosi babo bakumwitizya, kokuti bosi babo bakumwitizya mubwanaloli.

¹⁹ Akubapa vivyo bakulonda babo bakumuchindika akwivwa ukulila kwabo nukubapoka.

²⁰ U Mwene akubasungilila bosi babo bamughanite, loli akwiza pakubanangannya abantu ababibi.

²¹ Umulomo wane ghukwiza pakumupala u Mwene, sona ivipeliwa vyosi vilipalaye itabwa lyache izelu bwila na bwila.