Masalimo 144 - IBAYIBOLO 2024

U mwene akumupala u Chala pachifukwa icha bupoti

Isalimo ilya Devedi.

¹ U Mwene apaliwanje, pakuti we lyalabwe lyane, yuyo azimanyisya inyobe zyane pakulwa ubwite, sona utufingwi twane pakulwa.

² We Chala wane uwa lughano, ni linga lyane sona chitembe chane nu mupoki wane. We ngulu yane mumo nkuponelamo yuyo akumpotela bosi babo bali pasi papane.

³ Wee Mwene, nkimba umuntu wewenu ukuti umusungililaye? Nkimba umwana uwa muntu wewenu, ukuti umupasikizyanje?

⁴ Umuntu ayanite bulo nu muyi, ghope amasiku ghache ghayanite nu muzyezye ghugho ghukuzyebeluka.

⁵ Wee Mwene, zepulannya kumwanya, po ika pachisu ichapasi. Palamasya amaghamba umwakuti ghasukaye ilyosi.

⁶ Tumagha akamesya pakubanyampannya abalwani, sumba utulasilo twako pakubachimbizya.

⁷ Gholosezya inyobe yako pachisu ichapasi, po umpoke kumizi aghamaka. Sona umpoke munyobe izya bayeni.

⁸ Abantu banaba mumulomo wabo mwizuye ubumyasi bwene, sona bakulapa bo bumyasi bwene.

⁹ Wee Chala, nkwiza pakukwimbila ulwimbo ulupya, sona nkwiza pakukulizizya ipango.

¹⁰ Pakuti ukubavwa abamwene pakupota, sona ukumpoka ne mubombi wako u Devedi kubufwe ubwa panga.

¹¹ Mpoka munyobe izya bayeni, mumulomo wabo muzuye ubumyasi bwene, sona bakulapa bo bumyasi bwene.

¹² Po abana bitu abalumendo bakwiza pakuba na maka pabulemendo bwabo ngati makwi ghagho ghakukula akiza nkani Bope abana bitu abalindu bakwiza pakuba ngati zyo mpanda, zizyo zikuyipela inyumba iya bumwene ukuti yibonekaye akiza.

¹³ Intamba zyitu zikwiza pakwizula, ni vyakulya ivyakulenalekana. Ing'ozi zyitu zikwiza pakunyama nukuba amasabuzani, nukuba nyinji nkani umwakulyesezyamo.

¹⁴ Ing'ombe zyitu zikwiza pakunyamula ukatundu umung'wamu. Abalwani batakwiza pakumongola ulupaso sona batakwiza pakutusenda mubuzya mutakwiza pakubamo ukulila ukwa ntamyo mumisebo yitu.

¹⁵ Basayiwa abantu babo bakupokela ulusayo lunulu. Basayiwa abantu babo u Mwene we Chala wabo.