Masalimo 143 - IBAYIBOLO 2024

Ulwiputo ulwakulaba ubwavwilizi

Isalimo ilya Devedi.

¹ Wee Mwene, ivwa ulwiputo lwane, sona ivwa ukulila kwane ukuti unyavwe. Unyavwe pakuti we mubusubiliwa sona we mugholosu.

² Utakandongaye ne mubombi wako, pakuti atalipo nayumo umumi, yuyo mugholosu pamaso papako.

³ Umulwani akunchimbizya, nukunkanyankila pasi. Akunyikazya muchisi ngati po ne muntu yuyo akafwa kale.

⁴ Po umuzimu wane wadedebala nkani, sona umoyo wane ghuli nubogha.

⁵ Nkughakumbuka amasiku aghakale, nkuzyinong'ona imbombo zyako zyosi, sona ni mbombo izya nyobe zyako.

⁶ Nkukwezya inyobe zyane kukwako, umoyo wane ghuli ni nyota nawe, ngati po chisu ichumizu.

⁷ Wee Mwene, unyamule lubilolubilo, pakuti umuzimu wane wadedebala. Utakanfisilaye icheni chako, lumo ningayana na bantu babo bali mwipumpa.

⁸ Pandabindabi posi unkumbusyanje nizya lughano lwako, lulo lutakupotwapo nalumolumo, pakuti nkusubiye wewe. Undanjizyanje izila iyakuti nendayemo, pakuti nkwiputa kukwako.

⁹ Wee Mwene, mpoka munyobe izya balwani bane, pakuti nkuvwama mumwako.

¹⁰ Umanyisyanje ubwighane bwako, pakuti awe we Chala wane. Umuzimu wako umwiza ghundongozyanje muzila yako inyiza.

¹¹ Wee Mwene, sungilila ubumi bwane, pachifukwa icha itabwa lyako. Sona unyefyemo muntamyo pakuti we mugholosu.

¹² Pachifukwa icha lughano lwako, lulo lutakupotwapo nalumolumo. Ubazimizyanje abalwani bane. Ubanangannye bosi babo bakumbenga, pachifukwa ichakuti ne mubombi wako.