Masalimo 141 - IBAYIBOLO 2024

Ulwiputo ulwa pachamabwila

Isalimo ilya Devedi.

¹ Wee Mwene, nkukwitizya, zagha lubilolubilo ukuti unyavwe, ivwa izyu lyane, bo nkukwitizya.

² Inyiputo zyane zibanje ngati twakufukizya utwakununkila pamaso papako. Ukukwezya inyobe zyane mumwanya, kubanje ngati cho chakwiyipa icha pachamabwila.

³ Wee Mwene, mbikila umulindilili pamulomo wane, sona ughulindililaye umulyango uwa pamilomo yane.

⁴ Umoyo wane ghutakawesiwanje ni vintu ivibibi, sona intakasendayepo ichigaba mumbombo imbibi. Utakanyitikizyanje ukuti nangalaye poka na babomba mbibi, sona intakalyanje nabo ichakulya chabo ichinonu.

⁵ Umuntu umugholosu angankoma pamo ukunchemela, pachifukwa ichakuti akumpelela ichisa. Anganchemela pachifukwa ichakuti chili ngati mafuta kumutu wane sona ulwiputo lwane ulwakususannya ni mbombo izya bantu ababibi.

⁶ Abalongozi babo bakwiza pakusumbiwa pasi ukufuma pamwanya pighamba, po abantu ababibi bakwiza pakumanya ukuti amazyu ghane ghanaloli.

⁷ Bakwiza pakunena ukuti, “Ngati mumo umuntu akudibulila nukwefya itope mumughunda, umwakuyana bulo ghope amafupa ghabo, ghakwiza pakunyampana mwipumpa.”

⁸ Wee Mwene Uwamaka Ghosi, loli ane nkusubiye wewe, awe we buzilo bwane ubwakuchimbililako, po utakitikizye ukuti infwanje.

⁹ Umpoke kuvipingo vivyo banteghite navyo, sona kuvipingo vivyo ababomba mbibi baviteghite.

¹⁰ Abantu ababibi bawilayemo muvipingo vyabo, bo nkudumusannya umwakufwasa.