Masalimo 140 - IBAYIBOLO 2024

Ulwiputo ulwakulaba ubupoki

Kumulongozi uwa bwimbi. Isalimo ilya Devedi.

¹ Wee Mwene, mpoka munyobe izya bantu ababibi, unsungilile akiza munyobe izya bantu aba vyongo.

² Akabalilo kosi bakubatika bulo pakumbombela ivibibi, akabalilo kosi bakwandizya ivyongo.

³ Bakupyasya indimi zyabo ukuti zibanje ngati zya njoka, mumulomo wabo muli ubwanga ubwa bachipili.

⁴ Wee Mwene, mpoka munyobe izya bantu ababibi, umpoke ku bantu abalombwa, babo bakubatika ukuti bangwisye.

⁵ Abantu abamituvyo bantegha ni chipingo, po muzila zyane bantegha ni mpote ukuti bandeme.

⁶ Wee Mwene, nkukubuzya nkuti, “Awe we Chala wane.” Wee Mwene, ivwa ukulila kwane ukuti unyavwe.

⁷ Wee Mwene Uwamaka Ghosi, Umupoki wane uwamaka, we ukumpoka pakabalilo aka bwite.

⁸ Wee Mwene, utakabapanje abantu ababibi ivintu vivyo bakuvinyonywa. Utakitikizyanje ukuti vivyo bakubatika ukuti vikwanilisiwanje, lumo banganda pakwituvya.

⁹ Utakabitikizyanje abalwani bane babo banyavwaniye ukuti bampote, sona inguno zyabo zibanyokele.

¹⁰ Amazimwa agha moto ghabawilaye, sona basumbiwanje muchiliba icha moto umwakuti batakepayemo nalumo.

¹¹ Umuyebi atakikalanaye muchisu, sona intamyo zibawilaye abantu abalombwa.

¹² Inzimenye ukuti u Mwene ukubabombela mubwanaloli abapina, sona nukuti akubimila abapotwe.

¹³ Naloli abagholosu bakwiza pakulipala itabwa lyako, sona abantu abiza bakwiza pakwikala pamaso papako.