Masalimo 14 - IBAYIBOLO 2024

Ububibi ubwa muntu

Kumulongozi uwa bwimbi. Isalimo ilya Devedi.

¹ Umupunganu akunena mumoyo wache akuti, “U Chala ataliko.” Abantu bosi banyonganu, imbombo zyabo mbibi. Atalipo nayumoyumo yuyo akubomba inyiza.

² Bo ali kumwanya u Mwene akubennya abantu pachisu ichapasi, umwakuti ennye nanti balipo bamo abantu abamahala, babo bakumulondelezya u Chala.

³ Abantu bosi bapulumpa, bosi bo banyonganu, sona atalipo nayumoyumo yuyo akubomba inyiza, awe atalipo nayumoyumo.

⁴ Fwandi ababomba imbibi bate na mahala? Bo babo bakubalya abantu bane ngati po bakulya chibama, sona bo babo batakumwiputa u Mwene.

⁵ Po bakwiza pakuba nubogha, pakuti u Mwene ali pakasi pa bagholosu.

⁶ Mwee babibi, mukuzivulungannya imbatiko izya bapina, loli mwa Mwene momumo bakuvwamamo.

⁷ Mwee nalondagha nkani, ngali ubupoki ubwa Izilayeli bukufumila ku Ziyoni! Bo u Mwene akubapela abantu bache, ukuti ivintu vibendelaye sona akiza, u Yakobo asekelaye, sona wepe u Izilayeli ahobokaye!