Masalimo 138 - IBAYIBOLO 2024

Ulwiputo ulwakupalizikizya

Isalimo ilya Devedi.

¹ Wee Mwene nkwiza pakukupala nu moyo wane ghosi, nkwiza pakukwimbila inyimbo izya mapalo pamaso pa bachala.

² Nkwiza pakufughamila kunyumba yako izelu, sona nkwiza pakulipala itabwa lyako pachifukwa icha lughano nu busubiliwa bwako, pakuti walanjizya ukuti itabwa lyako na mazyu ghako, vili pamwanya ukuchila ivintu vyosi.

³ Bo nakwitizya, ukanyamula, sona ukaghukazya umoyo wane na maka ghako.

⁴ Wee Mwene, abamwene bosi aba muchisu ichapasi bakupalaye, bo bivwa amazyu ghako.

⁵ Bimbaye pazizyo u Mwene abomba, pakuti ubuchindamu ubwa Mwene bukulu.

⁶ Napapo u Mwene ali kumwanya, akubasungilila abantu abakwiyisya, loli abakwituvya akubamanyila pabutali bulo.

⁷ Napapo nkwenda muntamyo, ukubusungilila ubumi bwane. Ukugholosya inyobe yako pakubakanizya abalwani bane babo bankalaliye, sona inyobe yako indilo yikumpoka.

⁸ U Mwene akwiza pakukwanilisya ubwighane bwache papane. Wee Mwene ulughano lwako lwa bwila na bwila, po utakazilekaye imbombo izya nyobe zyako.