Masalimo 135 - IBAYIBOLO 2024

Ulwimbo ulwamupalizikizya u Mwene

¹ Mumulapalaye u Mwene! Mwee babombi aba Mwene, lipalaye itabwa ilya Mwene,

² mwe mukwimilila mu Nyumba iya Mwene, mulubinjilo ulwa Nyumba iya Chala witu.

³ Mumupalaye u Mwene pachifukwa ichakuti u Mwene mwiza, Mulyimbilaye amapalo itabwa lyache pakuti lyakuhobosya.

⁴ Amusala u Yakobo pakuba wache nu wache, po amusala u Izilayeli pakuba bukabi bwache.

⁵ Inzimenye ukuti u Mwene mukulu nkani, inzimenye sona ukuti u Mwene mukulu nkani ukubachila abachala bosi.

⁶ U Mwene akubomba ichintu chosi chicho chikumuhobosya, kumwanya na pachisu ichapasi, sona munyanja, na mosi mubwibizu.

⁷ Akughakwezya amabingu ukwanda kubumalilo ubwa chisu, akunyampannya utumesya utwa vula, po akutuma impepo ukufuma munyumba izyakusungilamo.

⁸ Akabaghogha abakatote bosi aba ba Ijiputi, sona nu mwana wesi uwa chinyamana uwakwanda pakupapiwa.

⁹ Wee Ijiputi! U Chala akabomba ivimanyilo ni viswigho pakasi papako umwakuti amufunde u Falabo sona na babombi bache bosi.

¹⁰ Akazipota inko izinji inyinji, sona akabaghogha abamwene abamaka nkani.

¹¹ Kokuti u mwene u Sihoni, u mwene uwa ba Amoli, sona nu mwene u Ogi uwamu Bashani, poka na bamwene bosi aba mu Kenani.

¹² Po akabapa ichisu chilachila pakuba mpyana, pakuba mpyana iya bantu bache aba Izilayeli.

¹³ Wee Mwene, itabwa lyako lya bwila na bwila, Itabwa lyako limanyikwe kunkulilo zyosi.

¹⁴ Pakuti u Mwene akwiza pakubapa ubwanaloli abantu bache, sona akwiza pakuba nichililizi na bantu babo bakumubombela.

¹⁵ Ivifwani ivya inko izinji we siliva nu golide, vinivi vipangiwe ni nyobe izya bantu.

¹⁶ Vili na malomo, loli vitanganena, vili na maso, loli vitangennya,

¹⁷ vili na makutu, loli vitangivwa, sona vite nu muyi mumilomo yabo.

¹⁸ Abantu babo bakuvipanga, bayanite bulo navyo, sona na wesi yuyo akuvisubila.

¹⁹ Wee nyumba iya Izilayeli, mupalaye u Mwene. Wee mbumba iya Aloni, mupalaye u Mwene.

²⁰ Wee mbumba iya Levi, mupalaye u Mwene, sona na mwebosi mwe kumuchindika, mupalaye u Mwene.

²¹ Apaliwanje u Mwene mu Ziyoni, yuyo akwikala mu Yelusalemu. Mupalaye u Mwene.