Masalimo 132 - IBAYIBOLO 2024

Ukuyipala Inyumba iya Chala

Ulwimbo ulwakubukila ku Yelusalemu.

¹ Wee Mwene, umukumbukaye u Devedi, sona nintamyo zizyo akomanite nazyo.

² Akalapa ichilapo kwa Mwene, nukufingana nu Wamaka nkani uwa Yakobo ukuti,

³ “Itankwiza pakwinjila munyumba yane pamo pakughona pachitala chane.

⁴ Ntakwiza pakuchelezya pamo pakusyupila,

⁵ mupaka imwaghile u Mwene ubuzilo ubwakwikalapo, apakwikala u Wamaka uwa Yakobo.”

⁶ Mu Betelehemu tukivwa nizya Bokosi ilya Lufingo, sona tukalyagha mumughunda uwa Yeyilimu.

⁷ Twende tubukaye kuko akwikala, po tumwiputaye pachitengo chache icha bumwene.

⁸ Wee Mwene, vundumuka, ubukaye papo ungatuzyapo, awe poka ni bokosi ilya maka ghako.

⁹ Abaputi bako bavwalaye ubugholosu, sona abantu bako abazelu bimbaye nu lusekelo.

¹⁰ Pachifukwa icha Devedi umubombi wako, utakamukanaye umupakiwa wako.

¹¹ U Mwene akalapa kwa Devedi po atakwiza pakuchandula ichilapo chache akati, “Nkwiza pakumwikazya pachitengo icha bumwene weka uwa bana bako abalumendo.

¹² Nanti abana bako bakughakonka amalamulo ghane, sona ni ndaghilo zyane, zizyo nkubamanyisya, po abana babo bakwiza pakulaghila pabumwene bwako bwila na bwila.”

¹³ Pakuti u Mwene amusala u Ziyoni, sona akulonda ukuti ikalaye mulamula.

¹⁴ “Ubu bo buzilo bwane ubwakutuzyapo bwila na bwila, nkwiza pakwikalapo, pakuti napanyonywa nkani.

¹⁵ Nkwiza pakukasaya akaya akakulu nkani ni vyakulya ivyinji nkani, abantu babo bapina mukaya kala, bakwiza pakubapanga nivyakusobelwa.

¹⁶ Abaputi bache akwiza pakubavwika inkazo izya bupoki, po abantu bache abazelu, bakolomokaye nu lusekelo.

¹⁷ “Palapala nkwiza pakubukwezezyapo ubumwene ubwa Devedi, sona namuyanizyizya inyale umupakiwa wane.

¹⁸ Nkwiza pakubavwika isoni abalwani bache, Loli impumpu yache yinyezimilaye.”