Masalimo 129 - IBAYIBOLO 2024

Ukubiputila abalwani aba ba Izilayeli ukuti batakabayivye

Ulwimbo ulwakubukila ku Yelusalemu.

¹ U Izilayeli anenaye atinji, Abalwani bane banjivya nkani ukwanda ko kubulumendo bwane.

² Banjivya nkani ukwanda ko kubulumendo bwane, loli batampotitepo nalumo.

³ Abayivyi bakanvulazya panyuma, yane ngati po bantu bakulima nu pulawo mumughunda.

⁴ Loli u Mwene mugholosu, ansatuye inkusa zizyo abantu ababibi bakampinya nazyo.

⁵ Bosi babo bamubengite u Ziyoni, bakoziwanje isoni nukuchimbiziwa.

⁶ Babanje ngati lisote pachisonje, lilyo likufoka bo lichili na pakukula.

⁷ Nayumoyumo akulibungannya, pamo akulinyamula munkose.

⁸ Babo bakudumusannyapo batakatinji, “U Mwene akusaye! Tukukusaya mwitabwa ilya Mwene.”