Masalimo 128 - IBAYIBOLO 2024

Ulusayo pakumwivwila u Mwene

Ulwimbo ulwakubukila ku Yelusalemu.

¹ Basayiwa babo bakumuchindika u Mwene, babo bakughakonka amalamulo ghache.

² Ukwiza pakulyanga ivikomwa ivya mbombo zyako, ukwiza pakuba we musayiwa, sona ivintu vikwiza pakukwendelagha akiza.

³ Umuchi akwiza pakuba ngati lutabo ulwa mampesya lulo lukwela, bope abana bako bakwiza pakuba ngati vimelwa ivya makwi agha misyunguti, ukuzyungulila itebulo lyako.

⁴ Umuntu yuyo akumunyila u Mwene, akwiza pakuba musayiwa ngati bunubu.

⁵ U Mwene yuyo akwikala mu Ziyoni akusaye, mumasiku ghosi agha bumi bwako, sona wennye ukuti ivintu vikwendagha akiza mu Yelusalemu.

⁶ Ubanje nubumi ubutali, umwakuti ubennye abanyenya bako. Mu Izilayeli mubanje umutende.