Masalimo 12 - IBAYIBOLO 2024

Ulwiputo ulwakulaba ubwavwilizi

Kumulongozi uwa bwimbi. Ukuyana nu lwimbo ulwa Sheminiti. Isalimo ilya Devedi.

¹ Wee Mwene nyavwa, pakuti atasyalite nayumoyumo umuntu umugholosu, sona abasubiliwa bazimila pakasi pabantu.

² Umuntu wesi akutamanta ku mupalamani wache, sona akumuzimbula na mazyu amanonu.

³ U Mwene ayighalilaye imilomo yosi imichevu sona nu lulimi losi ulwakwitutumula.

⁴ Abantu banaba bakutinji, “Tukwiza pakupota ni ndimi zyitu, po nkimba wewenu angatupota na malomo ghitu?”

⁵ “Pachifukwa ichakuti abadedebazu bakuyivyiwa, sona nukuti abapotwe bakukoloma, ane ne Mwene nkwiza pakuvundumuka. Ane ne Mwene nanena. Nkwiza pakubapoka munyobe izya babo bakubayivya.”

⁶ Amazyu agha Mwene masubiliwa ngati we siliva yuyo aswefiwa numoto akaseveni.

⁷ Wee Mwene, utusungililaye akiza, sona utupokaye munyobe izya bantu banaba bwila.

⁸ Abantu ababibi bakwembela bulo, bo abantu bakubupala ububibi.