Masalimo 119 - IBAYIBOLO 2024

Ululaghilo ulwa Mwene

¹ Basayiwa babo inkalo yabo yite ni chilema nachimochimo, babo bakwenda ukuyana nu lulaghilo ulwa Mwene.

² Basayiwa babo bakughasunga amalamulo ghache, nukumulondelezya na moyo ghabo ghosi.

³ Batakubomba nachimochimo ichibibi, loli bakwenda muzila zyache.

⁴ Ukatupa indaghilo zyako umwakuti tuzikonkaye mubusubiliwa.

⁵ Nalondagha nkani ukuti ngali inkalo yane yabanga nyiza, pakughakonka amalamulo ghako.

⁶ Po ntakwiza pakukoziwa isoni, bo nkughinong'ona amalamulo ghako ghosi.

⁷ Nkwiza pakukupalizya nu moyo uwanaloli, bo nkuzimanyila indaghilo zyako ingolosu.

⁸ Nkwiza pakughakonka amalamulo ghako, po utakandekaye nemwene.

Pakulukonka ululaghilo ulwa Mwene

⁹ Nkimba abachilumendo bangisungilila bulibuli, umwakuti babanje ni nkalo izelu? Pene papo nanti akulyivwila izyu lyako.

¹⁰ Nkukulondelezya nu moyo wane ghosi, po utakitikizyanje ukuti impotwe pakuzikonka indaghilo zyako.

¹¹ Nkulisunga izyu lyako mumoyo wane, umwakuti intakakubombelaye imbibi.

¹² Wee Mwene upaliwanje, umanyisyanje amalamulo ghako.

¹³ Nkuzitambula indaghilo zyako zyosi, zizyo wazinena nu mulomo wako.

¹⁴ Nkuhoboka nkani pakughakonka amalamulo ghako, ukuchila ubukabi ubwinji.

¹⁵ Nkwinong'onapo nkani nizya ndaghilo zyako, nukuzilolotela izila zyako.

¹⁶ Nkuhoboka nkani na malamulo ghako, sona ntakwiza pakuliluvya izyu lyako.

Ubuhobosu mu Lulaghilo ulwa Mwene

¹⁷ Umbombelaye ivyiza ne mubombi wako umwakuti imbanje nubumi, nukulyivwila izyu lyako.

¹⁸ Nyighula amaso ghane, umwakuti nennye ivyakuswighisya, vivyo vili mu lulaghilo lwako.

¹⁹ Ne mwendazila bulo muchisu ichi, po utakanvindaye amalamulo ghako.

²⁰ Umoyo wane wadedebala pachifukwa ichakuti, nkuzisamba indaghilo zyako akabalilo kosi.

²¹ Abantu abakwitutumula ukubachemela, kokuti babo baghuniwe, sona babo bakwepako ku malamulo ghako.

²² Unyefye intuko nu musamu, pakuti nkuzisunga indaghilo zyako.

²³ Napapo abalaghili bakwikala pasi nukunjeba, ane ne mubombi wako nkwiza pakwinong'ona nizya malamulo ghako.

²⁴ Indaghilo zyako zikunhobosya nkani, pakuti zikumanyisya amahala.

Ukunyonywa pakuzikonka indaghilo izya Mwene

²⁵ Indi lambalala palufumbi, po ubusungililaye ubumi, ukuyana nizyu lyako.

²⁶ Bo nazyaghannya imbombo zyane, ukanyamula, polelo manyisya amalamulo ghako.

²⁷ Nyavwe ukuti nivwisye ivimanyisyo, ivya malamulo ghako. Po nkwiza pakwinong'ona nizya viswigho vyako.

²⁸ Umoyo wane wadedebala nkani, pachifukwa icha chitima unkazyanje ukuyana nizyu lyako.

²⁹ Unyefyeko kubuzimbuli, ubanje ni chisa nane, pakumanyisya ululaghilo lwako.

³⁰ Nasala izila iya bwanaloli. Sona nabika umoyo wane pandaghilo zyako.

³¹ Wee Mwene, ingaghakakatiye amalamulo ghako, po utakitikizyanje ukuti nkoziwe isoni.

³² Nkwiza pakuchimbilagha mumalamulo ghako, pakuti waghusatula umoyo wane.

Ubuhobosu mu Ndaghilo izya Mwene wane bughonite pa malamulo ghako.

³³ Wee Mwene, manyisya pakuzikonka indaghilo zyako, po nkwiza pakughasunga mupaka pabumalilo.

³⁴ Umpe akivwisizye aka lulaghilo lwako, po nkwiza pakulusunga, sona nkwiza pakulikonka nu moyo wane ghosi.

³⁵ Ndongozya umwakuti ingakonkaye amalamulo ghako, pakuti ghakuhobosya nkani.

³⁶ Mpanga ichinyonywa icha malamulo ghako, mubuzilo ubwa chinyonywa icha bukabi ubwa bumyasi.

³⁷ Ughapelaye amaso ghane, ukuti ghatakanyonywanje ivintu vivyo vite ni mbombo. Umpe ubumi ukuyana nizila zyako.

³⁸ Kwanilisya zizyo ukundayizya ane ne mubombi wako, umwakuti abantu bakunyilaye.

³⁹ Unyefyezyeko umusamu ghugho nkughunyila, pakuti amalamulo ghako miza.

⁴⁰ Amalamulo ghako nkughasamba nkani, po umpe ubumi pachifukwa ichakuti we mugholosu.

Pakulusubila ululaghilo ulwa Mwene

⁴¹ Wee Mwene, ulughano lwako lubanje nane, lulo lutakupotwangapo nalumolumo. Umpoke ukuyana namumo ukandayizizya.

⁴² Po nkwiza pakumwamula umuntu yuyo akuntuka, pakuti indisubiye izyu lyako.

⁴³ Nalamba utakalizompolaye izyu ilyanaloli mumulomo wane, pakuti ingasubiye amalamulo ghako.

⁴⁴ Akabalilo kosi nkwiza pakulikonka ilamulo lyako, sona bwila na bwila.

⁴⁵ Nkwiza pakwenda ne mwabuke, pakuti naghasunga amalamulo ghako.

⁴⁶ Nkwiza pakughafumusya amalamulo ghako pamaso pa bamwene, sona ntakwiza pakukoziwa isoni.

⁴⁷ Pakuti amalamulo ghako ghakunhobosyanga, pachifukwa ichakuti ingaghanite nkani.

⁴⁸ Ingachindikite amalamulo ghako, ghagho ingaghanite nkani, sona nkughinong'onelagha akabalilo kosi.

Ukulusubila ululaghilo ulwa Mwene

⁴⁹ Kumbuka ilayizyo lyako kukwane, ne mubombi wako, pakuti ukampa ulusubilo.

⁵⁰ Chicho chikunsangalusya bo indi muntamyo chakuti, ilayizyo lyako likumpa ubumi.

⁵¹ Abantu abamituvyo bakunyobezya umwakufikapo, loli intakululekapo ululaghilo lwako.

⁵² Wee Mwene, nanti nkughakumbuka, amalamulo ghako aghakale, po nkusangaluka.

⁵³ Nkukalala nanti nkubennya abantu ababibi bakulunangannya ululaghilo lwako.

⁵⁴ Amalamulo ghako ghakulindagha mumulomo wane ghaba lwimbo, posi papo nkwikala.

⁵⁵ Wee Mwene, pabusiku nkulikumbuka itabwa lyako, sona nkwiza pakulusunga ululaghilo lwako.

⁵⁶ Ichintu chicho chikuhobosya chakuti: Nkughakonka amalamulo ghako.

Pakwiyipa nemwene ku ndaghilo izya Mwene

⁵⁷ Wee Mwene, awe we mpyana yane, nkufinga pakughivwila amazyu ghako.

⁵⁸ Nu moyo wane ghosi, nkulaba ukuti umpelelaye ichisa ukuyana ni layizyo lyako.

⁵⁹ Ninong'onagha nizya nkalo yane, po nkufinga pakughakonka amalamulo ghako.

⁶⁰ Ne mwengo nkani, sona intakuzyela pakughakonka amalamulo ghako.

⁶¹ Napapo abantu ababibi bangantegha ni vipingo vyabo, pope bulo intangaluluvya ululaghilo lwako.

⁶² Pakasi pabusiku nkulamusya pakukupalizya, pachifukwa icha malamulo ghako amagholosu.

⁶³ Ne mumanyani uwa bosi babo bakukunyila, kokuti bosi babo bakughakonka amalamulo ghako.

⁶⁴ Wee Mwene ichisu ichapasi chizuye nu lughano lwako, po umanyisyanje amalamulo ghako.

⁶⁵ Wee Mwene, wamubombela ubwiza umubombi wako, ukayana nizyu lyako.

⁶⁶ Umanyisyanje amahala ghako, sona na kivwisizye akiza, pakuti ingasubiye amalamulo ghako.

⁶⁷ Bo inchili pakuyimba, nkasobela, loli ilelo nkulivwila izyu lyako.

⁶⁸ We mwiza sona ukubomba zyo nyiza, po umanyisyanje amalamulo ghako.

⁶⁹ Napapo abantu abamyasi bakuyinanga imbili yane, pope bulo nkughasunga amalamulo ghako nu moyo wane ghosi.

⁷⁰ Abantu banaba bali na moyo amakafu, sona batakupasya nachimochimo, loli ane nkuhoboka nu lulaghilo lwako.

⁷¹ Chikaba chiza nkani ukuti nkayimba, pakuti nkamanyililapo amalamulo ghako.

⁷² Ululaghilo lwako lulo ukukumbusya, lo lwapamwanya nkani kukwane, ukuchila isalabazya amasabuzani agha siliva nu golide.

Ubwanaloli ubwa Ndaghilo izya Mwene

⁷³ Inyobe zyako zinkampela nukumata, po mpanga amahala aghakivwisizye aka malamulo ghako.

⁷⁴ Abantu babo bakukuchindika bahobokaye, bo bakunyennya, pakuti indisubiye izyu lyako.

⁷⁵ Wee Mwene, inzimenye akiza nkani, ukuti amalamulo ghako magholosu. Sona wanfunda nkani pakuti we musubiliwa.

⁷⁶ Ulughano lwako lulo lutakupotwanga nalumo, lo lunsangalusyanje akabalilo kosi, ukuyana namumo ukandayizizya ane ne mubombi wako.

⁷⁷ Umpelele ichisa umwakuti imbanje nubumi, pakuti ululaghilo lwako lukunhobosya

⁷⁸ Abantu abakwituvya bakoziwanje isoni, pakuti banangiye papo pate ni chifukwa nachimochimo, loli ane nkwiza pakwinong'ona nizya malamulo ghako.

⁷⁹ Abantu babo bakukunyila, bizaghe kukwane, babo bakughivwisya amalamulo ghako.

⁸⁰ Umoyo wane ghutakabanje ni chilema nachimochimo pandaghilo zyako, umwakuti Intakakoziwanje isoni.

Ukulaba ubupoki

⁸¹ Umoyo wane ghukubusamba nkani ubupoki bwako, loli ane indisubiye izyu lyako.

⁸² Amaso ghane ghalita pakulindilila zizyo ukundayizya, po nkuti, “Nkimba ukwiza pakunsangalusya liyi?”

⁸³ Napapo indi ngati ne likwela ilyakusungilamo uvinyo, pope bulo intaghaluvyizyepo amalamulo ghako.

⁸⁴ Nkimba ane ne mubombi wako indindililaye mupaka liyi? Fwandi ukwiza pakudumula liyi ubulongi ku bantu babo bakunvwima?

⁸⁵ Abantu abakwituvya bankumbila iviliba, babo balusulannya ululaghilo lwako.

⁸⁶ Amalamulo ghako ghosi masubiliwa, unyavwe pakuti abantu bakunvwima pabusita ichifukwa.

⁸⁷ Bakaba papipi pakunzimizya muchisu ichapasi, loli intaghasulitepo nalumo amalamulo ghako.

⁸⁸ Ubusungaye ubumi bwane, ukuyana nu lughano lwako, po inti nivwilaye amalamulo ghako.

Ulwitiko mu Ndaghilo izya Mwene

⁸⁹ Wee Mwene, izyu lyako lya bwila na bwila, sona likalanite uko kumwanya.

⁹⁰ Ubusubiliwa bwako bukubangako mupaka inkulilo zyosi, ukachikazya ichisu ichapasi, umwakuti chikalanite.

⁹¹ Ivintu vyosi vimikiwa pachifukwa icha lulaghilo lwako, ivyene viliko mupaka ilelo, pakuti ivintu vyosi vikukubombela.

⁹² Nanti indaghilo zyako zitabanga zyakunhobosya, ngali inzimiye mumayimba ghane.

⁹³ Ntakwiza pakughaluvya nalumo amalamulo ghako, pakuti wabusunga ubumi bwane pachifukwa icha malamulo ghanagha.

⁹⁴ Mpoka, ane ne wako, Pakuti naghakonka amalamulo ghako.

⁹⁵ Abantu ababibi bakulindilila ukuti banangannye, loli nkwiza pakwinong'ona nizya malamulo ghako.

⁹⁶ Nazyaghannya ukuti ivyiza vyosi vili nu bumalilo, loli amalamulo ghako ghate ni mpaka.

Ukuzighana Indaghilo izya Mwene

⁹⁷ Indughanite nkani ululaghilo lwako, umwakuti nkulwinong'ona musanya ghosi.

⁹⁸ Amalamulo ghako ghakumpa amahala, ukubachila abalwani bane, pakuti akabalilo kosi indi nagho.

⁹⁹ Nkwivwisya nkani ukumuchila umumanyisi wane, pakuti nkwinong'ona nizya malamulo ghako.

¹⁰⁰ Indi na mahala nkani ukubachila abasongo, pakuti nkughakonka amalamulo ghako.

¹⁰¹ Inyayo zyane zyazileghuka izila imbibi, umwakuti nivwilaye izyu lyako.

¹⁰² Ntaghasulitepo amalamulo ghako, pakuti wewe wemwenecho we wamanyisya.

¹⁰³ Mwee, amazyu ghako manoni nkani mumulomo wane, manoni nkani ukuchila ubuchi!

¹⁰⁴ Amalamulo ghako ghakumpa amahala, polelo izibengite izila imbibi.

Ulukozyo ulwa Ndaghilo izya Mwene

¹⁰⁵ Izyu lyako yo nyale iya nyayo zyane, sona lo lukozyo lwa muzila yane.

¹⁰⁶ Nalapa ichilapo sona nadumula, pakuzikonka indaghilo zyako ingolosu.

¹⁰⁷ Wee Mwene, nayimba nkani, po sungilila ubumi bwane, ukuyana nizyu lyako.

¹⁰⁸ Wee Mwene, pokela ichakwiyipa icha mapalo ghane, sona umanyisyanje amalamulo ghako.

¹⁰⁹ Napapo akinji bulo ubumi bwane buli pachulu, pope bulo ntakwiza pakululuvya ululaghilo lwako.

¹¹⁰ Abantu ababibi bantegha ni chipingo, loli intaghasulitepo nalumo amalamulo ghako.

¹¹¹ Amalamulo ghako mpyana yane iya bwila na bwila, pakuti ghakughuhobosya umoyo wane.

¹¹² Nabikapo nkani umoyo wane pakughakonka amalamulo ghako, mupaka bo bufwe bwane.

Umutende mu Ndaghilo izya Mwene

¹¹³ Imbabengite abantu aba moyo mabili, loli indughanite ululaghilo lwako.

¹¹⁴ Awe we buzilo bwane ubwakuvwamilamo, sona we ngulu yane, indisubiye izyu lyako.

¹¹⁵ Mwe babomba mbibi, epako kukwane, umwakuti ingakonkaye amalamulo agha Chala wane.

¹¹⁶ Unsungililaye ukuyana ni layizyo lyako, po nkwiza pakuba nubumi, sona utakitikizyanje ukuti nkoziwe isoni mulusubilo lwane.

¹¹⁷ Undemaye kunyobe, po nkwiza pakupokiwa, po akabalilo kosi nkwiza pakughakonka amalamulo ghako.

¹¹⁸ Ukubapa inkonto bosi babo bakughasulannya amalamulo ghako, pakuti bazimbuli.

¹¹⁹ Ababibi bosi aba muchisu ichapasi, ukubapima pakuba mintu bulo, loli ane ingaghanite amalamulo ghako.

¹²⁰ Umubili wane ghukutetema, pachifukwa icha kukunyila, po nkunyila ubulongi bwako.

Pakuzikonka Indaghilo izya Mwene

¹²¹ Nabomba chicho chigholosu sona chanaloli, po utakambikaye munyobe izya abantu abayivyi.

¹²² Layizya ukuti ukwiza pakumwavwa umubombi wako, utakitikizye ukuti abantu ababibi bala bamuyivye.

¹²³ Amaso ghane ghalita pakulindilila ubupoki. Pakulindilila ilayizyo lyako iligholosu.

¹²⁴ Mbombela ne mubombi wako, ukuyana nu lughano lwako. Po manyisya indaghilo zyako.

¹²⁵ Ane ne mubombi wako, mpanga amahala aghakwivwisizya, umwakuti ingamanye amalamulo ghako

¹²⁶ Wee Mwene, akabalilo kako kakwana akakubombela imbombo, pachifukwa ichakuti abantu balunangannya ululaghilo lwako.

¹²⁷ Naloli pakuti ingaghanite amalamulo ghako, ukuchila ugolide umwenecho,

¹²⁸ sona pachifukwa icha ndaghilo zyako, wazipela imbombo zyane pakuba ngolosu. Izibengite nkani izila imbibi.

Ukunyonywa pakuzikonka indaghilo izya Mwene

¹²⁹ Indaghilo zyako zyakuswighisya nkani,

¹³⁰ polelo nkuzikonka. Ukuvumbuliwa ukwa mazyu kukupa ulukozyo, sona kukupa amahala abantu babo bate na amahala.

¹³¹ Nkwasama umulomo wane nukumilwa, nkughasamba amalamulo ghako.

¹³² Ghalabukila kukwane, po umpelele ichisa, ukuyana namumo ukubabombela abantu, babo balighanite itabwa lyako.

¹³³ Undongozye akendele kane, ukuyana nizyu lyako, utakitikizyanje ukuti imbibi yindamulaye.

¹³⁴ Untabule munyobe izya bayivyi, umwakuti nkonkaye indaghilo zyako.

¹³⁵ Icheni chako chindamile ne mubombi wako, sona umanyisyanje indaghilo zyako.

¹³⁶ Amaso ghane ghakukupula amasozi, pachifukwa ichakuti ululaghilo lwako lutakusungiwa.

Ubugholosu ubwa ndaghilo izya Mwene

¹³⁷ Wee Mwene, we mugholosu, ghope amalamulo ghako magholosu.

¹³⁸ Amalamulo ghagho watupa magholosu sona masubiliwa.

¹³⁹ Ubukali bukwaka mumwane ngati moto, pachifukwa ichakuti abalwani bane baghasulannya amazyu ghako.

¹⁴⁰ Ilayizyo lyako lyayeliwa, po umubombi wako alighanite.

¹⁴¹ Napapo ne munandi sona insuliwe, intakuziluvya nalumolumo indaghilo zyako.

¹⁴² Ubugholosu bwako bwa bwila na bwila, sona ululaghilo lwako lwanaloli.

¹⁴³ Intamyo na mayimba vyangwila, loli nkuhoboka na amalamulo ghako.

¹⁴⁴ Indaghilo zyako ngolosu bwila na bwila, umpanje amahala ukuti imbanje nubumi.

Ulwiputo ulwakulaba ubupoki

¹⁴⁵ Wee Mwene, nkulila nu moyo wane ghosi, unyamule, po nkwiza pakuzikonka indaghilo zyako.

¹⁴⁶ Nkulila kukwako, umpoke, umwakuti izikonkaye indaghilo zyako.

¹⁴⁷ Nkulabila nkani, ukuti umpe ubwavwilizi, ane indisubiye nkani izyu lyako.

¹⁴⁸ Amaso ghane ghakuba bulo maso, umwakuti ninong'onaye nizya izyu lyako.

¹⁴⁹ Wee Mwene ivwa izyu lyane pachifukwa icha lughano lwako, ubusungaye ubumi bwane, ukuyana na malamulo ghako.

¹⁵⁰ Abantu babo bakubatika pakumbombela ivibibi bakupalamila kukwane, abantu babo bali kubutali nkani nululaghilo lwako.

¹⁵¹ Wee Mwene, loli awe uli papipi, sona ghope amalamulo ghako ghanaloli.

¹⁵² Namanya ukuti ukwanda kale, ukazyikazya indaghilo ukuti zibanjeko bwila na bwila.

Ulwiputo ulwakulaba ubupoki

¹⁵³ Ennya amayimba ghane, sona umpoke, pachifukwa ichakuti intaluluvizye ululaghilo lwako.

¹⁵⁴ Unyimile pa nongwa yane sona umpoke, umpe ubumi ukuyana ni layizyo lyako.

¹⁵⁵ Ubupoki buli kubutali nkani na babibi. Pakuti batakwivwila amalamulo ghako.

¹⁵⁶ Wee Mwene ichisa chako chikulu nkani, mpanga ubumi ukuyana nu bwanaloli bwako.

¹⁵⁷ Abantu abinji bo balwani bane, sona bakunvwima, loli intakwepukako ku Ndaghilo zyako.

¹⁵⁸ Nkubennya abantu banaba po nkuseluka, pachifukwa ichakuti batakughakonka amalamulo ghako.

¹⁵⁹ Wee Mwene, ennya namumo izighaniye Indaghilo zyako, po ubusungaye akiza ubumi bwane, ukuyana nu lughano lwako.

¹⁶⁰ Amazyu ghako ghanaloli, sona Indaghilo zyako ingolosu zya bwila na bwila.

Ukwipaghulila Indaghilo kwa Mwene

¹⁶¹ Abalaghili bakunvwima pabusita ichifukwa, loli umoyo wane ghukulinyila izyu lyako.

¹⁶² Nkusekela nizyu lyako, ngati muntu yuyo abwagha ubukabi.

¹⁶³ Imbabengite abazimbuli, Loli indughanite ululaghilo lwako.

¹⁶⁴ Nkukupala akaseveni pisiku, pachifukwa icha ndaghilo zyako ingolosu.

¹⁶⁵ Abantu babo balughanite ululaghilo lwako, bali nu mutende umukulu nkani, Po chitalipo nachimochimo ichakubapunuzya.

¹⁶⁶ Wee Mwene, nkulindilila ubupoki bwako, nukughakonka amalamulo ghako.

¹⁶⁷ Nkuzikonka indaghilo zyako, pachifukwa ichakuti izighanite nkani.

¹⁶⁸ Ingaghanite amalamulo sona ni ndaghilo zyako, pakuti inkalo yane yosi uyimenye.

Ulwiputo ulwakulaba ubwavwilizi

¹⁶⁹ Wee Mwene, ukulila kwane kufike pamaso papako. Mpanga amahala aghakivwisizye, ukuyana nizyu lyako lilalila.

¹⁷⁰ Ukulaba kwane kufike pamaso papako. Mpoka ukuyana nilayizyo lyako

¹⁷¹ Umulomo wane ghukupalaye akabalilo kosi, pachifukwa ichakuti ukumanyisya indaghilo zyako.

¹⁷² Leka ululimi lwane lwimbaye izyu lyako, pakuti amalamulo ghako magholosu.

¹⁷³ Inyobe yako yiyannye pakunyavwa, pakuti nasala indaghilo zyako.

¹⁷⁴ Wee Mwene, imbusambite nkani ubupoki bwako. Sona nkuhoboka ni ndaghilo zyako.

¹⁷⁵ Nyitikizya ukuti imbanje nubumi, ukuti nkupalaye, sona indaghilo zyako zinyavwanje.

¹⁷⁶ Napulumpa ngati yo ng'ozi iyakusobela, ndondelezya ne mubombi wako, pakuti intaghaluvizye amalamulo ghako.