Masalimo 118 - IBAYIBOLO 2024

Ukupalizya pachifukwa icha bupoti

¹ Mumupalizyanje u Mwene, pakuti mwiza, ulughano lwache lwa bwila na bwila.

² Aba Izilayeli batinji, “Ulughano lwache lwa bwila na bwila.”

³ Abaluko ulwa Aloni batinji, “Ulughano lwache lwa bwila na bwila.”

⁴ Abantu babo bakumuchindika u Mwene batinji, “Ulughano lwache ulwa bwila na bwila.”

⁵ Bo indi muntamyo, nkamulilila u Mwene, po akanyefyezya intamyo zyane zyosi.

⁶ U Mwene ali nane, po ntakwiza pakunyila. Nkimba umuntu angabomba choni nane?

⁷ U Mwene ali nane, sona we mwavwilizi wane, po nkwiza pakubapota abalwani bane.

⁸ Chiza nkani pakuchimbilila kwa Mwene, ukuchila pakumusubila umuntu.

⁹ Chiza nkani pakuchimbilila kwa Mwene, ukuchila pakubasubila abamwene.

¹⁰ Abantu aba inko izinji zyosi bakanzyungulila loli nkabanangannya na maka agha Mwene.

¹¹ Naloli bakanzyungulila, imbazu zyosi, loli nkabanangannya mwitabwa ilya Mwene.

¹² Bakanzyungulila ngati zuchi, loli bakazimila bulo ngati mivwa pamoto, sona nkabanangannya mwitabwa ilya Mwene.

¹³ Bakansunkilizya, umwakuti nkaba papipi pakuwa, loli u Mwene akanyavwa.

¹⁴ U Mwene we maka ghane, sona we lwimbo lwane, U Mwene we mupoki wane.

¹⁵ Teghelezya inyimbo izya bupoti muvisakasa ivya bagholosu zikuti, “Inyobe indilo iya Mwene yabomba ivintu ivikulu nkani!

¹⁶ Inyobe indilo iya Mwene yapota, sona inyobe indilo iya Mwene yabomba ivintu ivikulu nkani!”

¹⁷ Ntakwiza pakufwa, loli nkwiza pakuba mumi, po nkwiza pakuzilumbilila zizyo u Mwene abomba.

¹⁸ U Mwene anfunda nkani, loli atakanyitikizya ukuti ifwanje.

¹⁹ Nyighulila imiliyango iya bagholosu, nkwiza pakwinjilamo nukumupalizya u Mwene.

²⁰ Ughu gho mulyango uwa Mwene, papo abagholosu bakwiza pakwinjililapo.

²¹ Nkukupalizya, pakuti wanyamula, awe we mupoki wane.

²² Ibwe lilyo abazengi bakalikana ukuti lite ni mbombo, ilelo lyaba lyakulondiwa nkani ukuchila amabwe ghosi.

²³ U Mwene weyuyo abomba chinichi, po chakuswighisya nkani kukwitu.

²⁴ Ili lyo lisiku ilya bupoti ubwa Mwene, zagha tuhobokaye nukusekela.

²⁵ Wee Mwene, tupoke. Wee Mwene tukukulaba ukuti ivintu vitwendelaye akiza.

²⁶ Musayiwa yuyo akwizila mwitabwa ilya Mwene, ukufuma mu Nyumba iya Mwene tukubasaya.

²⁷ U Mwene we Chala, sona atupiye ulukozyo. Anda pakusekela bo munyamuye isamba nukuchizyungulila ichighemo.

²⁸ Awe we Chala wane, po nkupalizyanje, sona nkwiza pakufumusya nizya bukulu bwako.

²⁹ Mumupalizyanje u Mwene, pakuti mwiza, ulughano lwache lwa bwila na bwila.