Masalimo 116 - IBAYIBOLO 2024

Umuntu yuyo apona kubufwe akumupalizya u Chala

¹ Imughanite u Mwene, pakuti akalyivwa izyu lyane, sona akwamula inyiputo zyane.

² Pachifukwa ichakuti akunyivwa, po nkwiza pakumwiputa akabalilo kosi, bo inchili ne mumi.

³ Inkusa izya bufwe zikampinya, intamyo izya mapumpa zikangwila. Nkayimba nkani pachifukwa icha ntamyo na mayimba.

⁴ Po nkamwitizya u Mwene nkati, “Wee Mwene mpoka!”

⁵ U Mwene wachisa, sona mugholosu, u Chala witu wachililizi.

⁶ U Mwene akubavighilila abantu abakwiyisya, sona akampoka bo indi muntamyo impalapala nkani.

⁷ Wee moyo wane, tuzya, pakuti u Mwene akubombeye ivyiza.

⁸ U Mwene ukabupoka ubumi bwane kubufwe, sona amaso ghane kumasozi, inyayo zyane zyope zitakipunula,

⁹ umwakuti nendaye pamaso pa Mwene, muchisu icha bantu abumi.

¹⁰ Nkasubila polelo nkati, “Nkuyimba nkani.”

¹¹ Bo indi nubogha ubukulu nkani nkati, “Abantu bosi bamyasi.”

¹² Nkimba ningamunyosezya ichoni u Mwene, pavyiza vyosi vivyo ambombeye?

¹³ Nkwiza pakulukwezya ulubako lwabupoki, sona nkwiza pakulyitizya itabwa ilya Mwene.

¹⁴ Nkwiza pakukwanilisya ivilapo ivya Mwene, pamaso pabantu bache bosi.

¹⁵ Ubufwe ubwa bantu abazelu aba Mwene, bwakubaba nkani pantazi papache.

¹⁶ Wee Mwene, naloli ne mubombi wako, nkukubombela ngati mumo u mayi wane akabombela, wansatula kubunyololo bwane.

¹⁷ Nkwiza pakubika ichakwiyipa ichakupalizikizya kukwako, sona nkwiza pakulyitizya itabwa ilya Mwene.

¹⁸ Nkwiza pakukwanilisya ivilapo vyane kwa Mwene, pamaso pabantu bache bosi.

¹⁹ Mulubinjilo ulwa Nyumba iya Mwene, pakasi papako wee Yelusalemu. U Mwene apaliwanje.