Masalimo 115 - IBAYIBOLO 2024

U Chala weka uwanaloli

¹ Wee Mwene, te sweswe awe, loli itabwa lyako lichindikiwanje, pachifukwa ichakuti ulughano nu busubiliwa vyako.

² Nkimba choni chicho abantu aba inko bakutinji, “Nkimba u Chala wabo ali ko kwiyi?”

³ U Chala witu ali kumwanya, sona akubomba zyosi zizyo zikumuhobosya.

⁴ Loli ivifwani vyabo vya siliva nu golide, vivyo vipangiwe ni nyobe izya muntu.

⁵ Vili ni milomo, loli vitanganena, amaso vili nagho, loli vitangennya.

⁶ Vili na makutu, loli vitangivwa. Impuno zili navyo, loli vitanganusya,

⁷ Vili ni nyobe, loli vitangapalamasya, Inyayo vili nazyo, loli vitangenda, sona vitakufumya izyu nalimolimo kusingo zyabo.

⁸ Abantu babo bakuvipanga ivifwani vinivi bayanite navyo, sona na bosi babo bavisubiye.

⁹ Wee Izilayeli, umusubilaye u Mwene, pakuti we mwavwilizi wako, sona we ngulu yako.

¹⁰ Mwee baluko ulwa Aloni, musubile u Mwene, pakuti we mwavwilizi winyu, sona we ngulu yinyu.

¹¹ Amwe mwe mukumuchindika, musubile u Mwene pakuti we mwavwilizi winyu, sona we ngulu yinyu.

¹² U Mwene akutukumbuka, sona akwiza pakutusaya. Akwiza pakubasaya abamunyumba iya Izilayeli, sona akwiza pakubasaya abaluko ulwa Aloni.

¹³ U Mwene akwiza pakubasaya babo bakumuchindika, abanandi na basongo umwakuyana bulo.

¹⁴ U Mwene akubalizyanje nkani, awe poka na bana bako.

¹⁵ U Mwene abasaye, yuyo we Mupeli uwakumwanya ni chisu ichapasi.

¹⁶ Kumwanya kwa Mwene, loli ichisu ichapasi abapiye abantu.

¹⁷ Abafwe batakumupalagha u Mwene, pamo bosi babo bakubuka kuchisu icha bafwe.

¹⁸ Loli aswe twe tukumupalagha u Mwene, ukwanda ilelo mupaka bwila na bwila. Mumupalaye u Mwene.