Masalimo 112 - IBAYIBOLO 2024

Ubuhobosu ubwa muntu umwiza

¹ Mumupalaye u Mwene. Musayiwa umuntu yuyo akumuchindika u Mwene, yuyo akuhoboka nkani pakughakonka amalamulo ghache.

² Abana bache bakwiza pakuba bamaka nkani muchisu, sona abaluko lwache bakwiza pakusayiwa.

³ Ubukabi ni chuma vili munyumba yache, sona ubugholosu bwache ubwa bwila na bwila.

⁴ Napapo mungaba mo muchisi ulukozyo lukumwizila, pachifukwa ichakuti wachisa, wachililizi sona nu mugholosu.

⁵ Musayiwa yuyo akukopa ukusita ukukabilapo zimo, sona yuyo akubombela ivintu mubwanaloli.

⁶ Naloli atakwiza pakuyingana nalumolumo, umuntu umugholosu atakuluviwapo nalumo.

⁷ Atakwiza pakuba nubogha nanti ivwa ipangwi ibibi, umoyo wache wimite nkani, sona amusubiye u Mwene.

⁸ Umoyo wache mujivu, sona ate nubogha, pabumalilo pache, akubennya abalwani bache bo bapotwa.

⁹ Abagabila abapina ivyabupi mubwighane bwache, ubugholosu bwache ubwa bwila na bwila, akwiza pakuba wamaka nu muchindamu.

¹⁰ Umuntu umubibi akwiza pakuzyennya zinizi, po bakwiza pakukalala nkani. Akwiza pakusyeketula amino nukuzimila, sona ivintu vivyo akuvinyonywa vitakwiza pakubombiwa.