Masalimo 109 - IBAYIBOLO 2024

Ukumulaba u Chala pakumalana na balwani

Kumulongozi uwa bwimbi. Isalimo ilya Devedi.

¹ Wee Chala, yuyo nkumupala, utakabanje bulo myee,

² pakuti abantu ababibi na bamyasi, bakunenezannya izya kusambuka, sona bantamantizya ivintu ivyinji nkani.

³ Banyavwaniye na mazyu agha lubengo, sona bansambukiye ukusita ichifukwa.

⁴ Nanti nkubaghana, abene bakumbenga, loli ane ne muntu uwa nyiputo.

⁵ Bakuntanizya ichintu ichibibi pachintu ichiza, bo nkubaghana, abene bakumbenga.

⁶ Sala umuntu uwakwiminkana nawe, Po uwakunsusya imililaye kunyobe yache indilo.

⁷ Nanti alongiwa, abanje ninongwa, po inyiputo zyache zimusuzyanje.

⁸ Amasiku ghache ghadumukaye bulo, po umuntu yumo abupyanaye ubulongozi bwache bulabula.

⁹ Umwana wache yulayula abanje mulanda, sona umuchi wache abanje mufwilwe

¹⁰ abana bache balabayelabaye bulo, sona babachimbizyanje muvisami vyabo.

¹¹ Umukopezya ndalama, amufyulaye vyosi vivyo ali navyo, bope abayeni babafyulaye ivikomwa vivyo, batakutwinkilapo.

¹² Patakabepo nayumoyumo umuntu uwakumupelela ichisa, pamo pakubapelela abalanda.

¹³ Abaluko lwabo bafwanje bosi, ghope amatabwa ghabo, ghazimiwe mu nkulilo izya muntazi.

¹⁴ U Mwene azikumbukaye imbibi izya banyenya bache pantazi, sona zyope imbibi izya nyina zitakazimiwe.

¹⁵ Akabalilo kosi imbibi zibanje pantazi pa Mwene, sona batakabakumbukaye pachisu ichapasi.

¹⁶ Pakuti atakinong'onaghapo nalumo pakuba ni chisa, loli akabalilo kosi akabayivyanga abapina mupaka kubufwe, abakusobelwa sona na bakuyimba

¹⁷ akighana nkani pakughuna abanji, po inguno yiniyo yimuwilaye. Kope nukusaya abantu atakabasayaghaghapo, ulusayo lunulo lubanje kubutali nkani nawe.

¹⁸ Akayivwala inguno ngati nkazo. Yikinjila mumubili wache ngati mizi, sona na mumafupa ghache bulo ngati mafuta.

¹⁹ Inguno yiniyo yibanje ngati nkazo yakumuvwinka, ayipinyiliye bwila na bwila mumusana wache ngati we lamba.

²⁰ Ughu gho ghubanje muvwalo uwa Mwene, ku bantu babo bakumususya, zibawilaye abantu babo bakunena akabibi.

²¹ Loli awe wee Mwene Uwamaka Ghosi, umbombelaye inyiza, umwakuti indichindikaye itabwa lyako, umpoke pachifukwa icha lughano lwako ulwiza ulwa bwila na bwila.

²² Pakuti ne mupina, sona ne wakusobelwa, ghope umoyo wane ghuvulaye nkani.

²³ Nkuzyebeluka bulo ngati chizyezye icha pachambwila. Po nkutetema ngati we kanta.

²⁴ Ivimpevu vyane videdebazu, pachifukwa icha kutuzya pakulya, po naghanda nkani

²⁵ Ne chintu ichakobezya ku bantu babo bakunsusya, bo banyennya abantu banaba bakupukunnya imitu yabo.

²⁶ Wee Mwene Chala wane unyavwe, umpoke pachifukwa icha lughano lwako ulwa bwila na bwila.

²⁷ Abalwani bako bazimanye ukuti iyi yo nyobe yako, wee Mwene ukuti naloli wewe wazibomba zinizi.

²⁸ Baleke baghunaye, loli awe ukwiza pakusaya. Abantu abakwiminkana nane bakoziwanje isoni, umubombi wako akwiza pakusekela

²⁹ Abantu abakwiminkana nane babanje ni soni sona bannyembetililiwanje isoni ngati mwenda.

³⁰ Nkumupala nkani u Mwene nu mulomo wane, sona nkupalaye pakasi pachilundilo icha bantu.

³¹ Pakuti u Mwene akwimilila papipi na bantu aba kusobelwa, ukuti abapoke ku bantu babo bakudumula ukuti baghoghiwanje.